مونٹانا میں طیارہ حادثہ، سمارٹ واچ نے حادثے کی جگہ بتا دی

مونٹانا: امریکی ریاست مونٹانا میں ایک چھوٹے طیارے کے لاپتہ ہونے کے بعد جدید ٹیکنالوجی کی مدد سے حادثے کا مقام معلوم ہو گیا، تاہم بدقسمتی سے طیارے میں سوار تمام تین افراد جاں بحق ہو گئے۔

جمعرات کی شب ویسٹ ییلوسٹون ایئرپورٹ سے پرواز کرنے والا Piper PA-28 طیارہ چند ہی دیر بعد لاپتہ ہو گیا۔ حادثے کے مقام کا پتہ اس وقت چلا جب ایک مسافر کی اسمارٹ واچ نے اپنی آخری GPS لوکیشن فراہم کی، جو ییلوسٹون نیشنل پارک کے قریبی جنگلات میں تھی۔

گیلاٹن کاؤنٹی شیرف آفس کی ہدایت پر سرچ ٹیموں نے فوری طور پر جائے حادثہ کی تلاش شروع کی، اور تقریباً 30 منٹ کی تلاش کے بعد گھنے جنگلات میں طیارے کا ملبہ دریافت کیا گیا۔ حادثے میں تینوں افراد ہلاک ہوئے جن کی شناخت رابرٹ کونور، میڈیسن کونور اور کرٹ اینوچ روبے کے نام سے ہوئی ہے۔

فیڈرل ایوی ایشن ایڈمنسٹریشن (FAA) اور نیشنل ٹرانسپورٹیشن سیفٹی بورڈ (NTSB) اس حادثے کی وجوہات جاننے کے لیے تحقیقات کر رہے ہیں کہ آیا حادثہ موسمی حالات، تکنیکی خرابی یا انسانی غلطی کی وجہ سے پیش آیا۔

شیرف آفس نے اسمارٹ واچ کی مدد سے حادثے کا پتہ چلنے کو جدید ٹیکنالوجی کی کامیابی قرار دیا اور لواحقین کے ساتھ دلی ہمدردی کا اظہار کیا ہے۔