دنیا کے کئی حصوں میں کرسمس تقریبات کا آغاز

پیرس : دنیا کے مختلف حصوں میں کرسمس سیزن کا آغاز ہو گیا ہے ، فرانس کے دارالحکومت پیرس کی مرکزی شاہراہ شانزے لیزے کو رنگ برنگ روشنیوں سے منور کر دیا گیا ، جبکہ جرمنی کے دارالحکومت برلن میں جنڈرمن مارکیٹ کھول دی گئی ۔ کرسمس کی آمد آمد ہے اور دنیا کے مختلف شہروں میں اس کے استقبال کی تیاریاں شروع ہو گئی ہیں ۔ ہر سال کی طرح فرانس کے دارالحکومت پیرس کی مرکزی شاہراہ شانزے لیزے پر رنگ و نور کی برسات شروع ہو گئی ۔ اس بار سڑک کے دونوں جانب لگے درختوں کو نیلے اور سنہری رنگ کے قمقموں سے روشن کیا گیا ہے ۔ جگہ جگہ سٹالز لگ گئے ہیں جہاں کھانے پینے کی اشیا فروخت کی جا رہی ہیں ۔ جرمنی کے دارالحکومت برلن میں روائتی جنڈرمن مارکیٹ کا افتتاح کر دیا گیا ، روائتی جرمن سووینر ، کھانے پینے کے سٹالز اور چھوٹے بڑے ہر شخص کی دلچسپی کا سامان اس جگہ موجود ہے جس کے باعث دور دور سے لوگ یہاں آتے ہیں ۔ ہر برس کرسمس کی آمد پر لگنے والی یہ مارکیٹ نئے سال کے آغاز تک چلے گی ۔