صدر ٹرمپ کی رہائش گاہ میں گھسنے کی کوشش کرنے والا شخص فائرنگ سے ہلاک ہوگیا

واشنگٹن : امریکی سیکرٹ سروس نے صدر ڈونلڈ ٹرمپ کی نجی رہائش گاہ مارا لاگو میں غیرقانونی طور پر داخل ہونے کی کوشش کرنے والے ایک شخص کو گولی مار کر ہلاک کر دیا۔ سیکرٹ سروس کے ترجمان انتھونی گگلیلمی نے ایک پوسٹ میں بتایا کہ یہ شخص مسلح تھا اور جب وہ مارا لاگو کے حفاظتی زون میں داخل ہونے کی کوشش کر رہا تھا، تو اسے سیکرٹ سروس کے اہلکاروں اور کاؤنٹی کے شیرف نے گولی مار کر ہلاک کر دیا۔

یہ واقعہ اس وقت پیش آیا جب صدر ٹرمپ اپنی رہائش گاہ پر موجود نہیں تھے۔ گولی سے ہلاک ہونے والے شخص کا نام ابھی تک جاری نہیں کیا گیا۔ سیکرٹ سروس کے مطابق، اس شخص کو مارا لاگو کے شمالی گیٹ کے قریب دیکھا گیا، جہاں وہ شاٹ گن اور ایندھن کا کین اُٹھائے ہوئے تھا۔ مشتبہ شخص کی عمر تقریباً 20 برس تھی اور وہ شمالی کیرولائنا کا رہائشی تھا، جس کے اہلخانہ نے کچھ روز پہلے اُس کے لاپتہ ہونے کی اطلاع دی تھی۔

تفتیش کاروں کا خیال ہے کہ وہ شمالی کیرولائنا سے نکلا اور جنوب کی طرف روانہ ہوا، جہاں اس نے ایک شاٹ گن اٹھا لی۔ بندوق کا باکس اس کی گاڑی سے برآمد ہوا ہے۔