جوا ایپ کیس:ڈکی بھائی کے بینک اکاؤنٹس بحال اور ویڈیو اپلوڈ کرنے کی اجازت

لاہور: لاہور کی مقامی عدالت نے جوا ایپ کی تشہیر کے الزام میں زیرِ سماعت مقدمے میں معروف یوٹیوبر سعد الرحمان (ڈکی بھائی) اور ان کی اہلیہ عروب جتوئی کو ریلیف فراہم کر دیا ہے۔ عدالت نے ملزمان کے فریز کیے گئے بینک اکاؤنٹس فوری کھولنے کا حکم جاری کر دیا ہے۔
ضلع کچہری میں ہونے والی سماعت کے دوران عدالت نے یوٹیوبر کی مالی اور پیشہ ورانہ سرگرمیوں سے متعلق درج ذیل فیصلے دیے۔  عدالت نے حکم دیا کہ ڈکی بھائی کے تمام منجمد بینک اکاؤنٹس بحال کیے جائیں تاکہ وہ اپنی مالی ضروریات پوری کر سکیں۔
 عدالت نے ڈکی بھائی کو مخصوص شرائط کے ساتھ اپنے یوٹیوب چینل پر ویڈیوز اپلوڈ کرنے کی بھی اجازت دے دی ہے۔ عدالت نے نیشنل سائبر کرائم انویسٹی گیشن ایجنسی (NCCIA) کے گواہوں کو حکم دیا ہے کہ وہ آئندہ سماعت پر ہر صورت پیش ہو کر اپنا بیان ریکارڈ کروائیں۔
آج کی سماعت کے دوران این سی سی آئی اے (NCCIA) کے پراسیکیوٹر عدالت میں پیش نہ ہوئے، جس کے باعث کیس پر بحث مکمل نہ ہو سکی۔ عدالت نے پراسیکیوٹر کی عدم موجودگی کے باعث سماعت 11 مارچ تک ملتوی کر دی ہے۔