پاکستان نے بھارتی پروازوں کے لیے فضائی حدود کی بندش میں توسیع کر دی

اسلام آباد : پاکستان ائیرپورٹس اتھارٹی نے بھارتی طیاروں کی پاکستانی فضائی حدود میں پرواز پر پابندی کی مدت میں ایک ماہ کی توسیع کا اعلان کیا ہے۔

ترجمان کے مطابق، بھارتی رجسٹرڈ، ملکیت یا لیز پر لیے گئے تمام ہوائی جہاز، بشمول فوجی طیارے، اب 24 جون 2025 کی صبح 4 بج کر 59 منٹ تک پاکستانی فضائی حدود استعمال نہیں کر سکیں گے۔

یہ پابندی قومی سلامتی کمیٹی کے اجلاس کے فیصلے کے تحت لگائی گئی تھی جس کا مقصد ملکی سلامتی کو تحفظ فراہم کرنا ہے۔ اس سے قبل یہ پابندی 23 مئی تک تھی جو اب مزید ایک ماہ کے لیے بڑھا دی گئی ہے۔

پاکستانی حکام نے اس اقدام کو قومی سلامتی کے حوالے سے ضروری قرار دیتے ہوئے کہا ہے کہ فضائی حدود کی بندش سے ملک کی سرحدوں کا تحفظ مضبوط ہوگا۔