دوحہ میں بڑا بریک تھرو: پاکستان اور قطر کا تجارت، توانائی اور دفاع سمیت تمام شعبوں میں سٹریٹجک شراکت داری بڑھانے پر اتفاق

دوحہ : وزیراعظم پاکستان میاں محمد شہباز شریف اور قطر کے وزیراعظم شیخ محمد بن عبدالرحمان بن جاسم الثانی کے درمیان ایک اہم ملاقات ہوئی، جس میں دونوں ممالک نے برادرانہ تعلقات کو ٹھوس اقتصادی اور اسٹریٹجک شراکت داری میں بدلنے کے عزم کا اعادہ کیا ہے۔ اس اعلیٰ سطح کی ملاقات میں نائب وزیراعظم اسحاق ڈار اور آرمی چیف فیلڈ مارشل سید عاصم منیر بھی شریک تھے۔ملاقات کے دوران دونوں رہنماؤں نے دوطرفہ تعلقات کے تمام پہلوؤں کا تفصیلی جائزہ لیا۔ مذاکرات میں درج ذیل شعبوں میں تعاون کو مزید وسعت دینے پر اتفاق کیا گیا۔

 سرمایہ کاری، توانائی اور تجارتی حجم میں اضافے کے لیے عملی اقدامات۔

    دفاعی شعبے میں تعاون اور قطر کی ترقی میں پاکستانی افرادی قوت کے کردار کو مزید مستحکم بنانا۔

     دونوں ممالک کے درمیان عوامی اور ثقافتی روابط کا فروغ۔

وزیراعظم شہباز شریف نے خطے میں جاری کشیدگی میں کمی اور مذاکرات کے فروغ کے لیے قطر کے تعمیری سفارتی کردار کو خراجِ تحسین پیش کیا۔ دونوں رہنماؤں نے اس بات پر زور دیا کہ بین الاقوامی تنازعات کا حل اقوام متحدہ کے چارٹر اور بین الاقوامی قوانین کی روشنی میں پرامن طریقے سے ہونا چاہیے۔
پاکستان کی جانب سے اس اہم سفارتی بیٹھک میں نائب وزیراعظم اسحاق ڈار،  فیلڈ مارشل سید عاصم منیر، وفاقی وزیر اطلاعات عطا تارڑ اور معاون خصوصی طارق فاطمی نے بھی شرکت کی۔ فریقین نے سیاسی اور ادارہ جاتی روابط کے فروغ پر مکمل اطمینان کا اظہار کیا۔
دونوں وزرائے اعظم نے اسٹریٹجک شراکت داری کو مزید مضبوط بنانے کے عزم کے ساتھ علاقائی اور بین الاقوامی مسائل پر مسلسل رابطے میں رہنے اور ایک دوسرے کے موقف کی حمایت جاری رکھنے کا فیصلہ کیا ہے۔