ای سی سی نے استعمال شدہ کمرشل گاڑیوں کی درآمد کی راہ ہموار کر دی

اسلام آباد: وفاقی کابینہ کی اقتصادی رابطہ کمیٹی (ای سی سی) نے 5 سال سے کم عمر استعمال شدہ کمرشل گاڑیوں کی درآمد کی اجازت دے دی ہے۔ وزارت خزانہ کے اعلامیے کے مطابق وزیر خزانہ محمد اورنگزیب کی زیرصدارت ہونے والے ورچوئل اجلاس میں اس حوالے سے اہم فیصلے کیے گئے۔

ای سی سی کے اعلان میں کہا گیا ہے کہ یہ اجازت 30 جون 2026 تک محدود ہوگی، جس کے بعد گاڑیوں کی عمر کی حد ختم کر دی جائے گی۔ اس دوران درآمد ہونے والی گاڑیوں پر 40 فیصد ریگولیٹری ڈیوٹی عائد کی جائے گی، جو مالی سال 2029 تک ہر سال 10 فیصد کم ہوتی جائے گی اور آخر کار درآمدی ڈیوٹی ختم کر دی جائے گی۔

اعلامیے میں مزید بتایا گیا کہ درآمد شدہ کمرشل گاڑیاں ماحولیاتی اور حفاظتی معیار پر پوری اترنے کی شرط پر درآمد کی جائیں گی۔ اجلاس میں پی وی اے آر اے کے لیے 80 کروڑ روپے کی گرانٹ کی منظوری بھی دی گئی ہے۔

یہ فیصلہ ملکی مارکیٹ میں کمرشل گاڑیوں کی دستیابی اور ماحولیاتی تحفظ کے درمیان توازن قائم کرنے کی کوشش ہے۔