وزیر اعظم شہباز شریف سے یورپی یونین کی سفیرکی ملاقات، دوطرفہ تعلقات مزید مستحکم بنانے کے عزم کا اظہار

اسلام آباد  : وزیراعظم شہباز شریف سے یورپی یونین کی سفیر ڈاکٹر رینا کیونکا نے وزیراعظم ہاؤس میں ملاقات کی، جس میں پاکستان اور یورپی یونین کے درمیان تعلقات کو مزید مستحکم بنانے اور تعاون بڑھانے کے عزم کا اظہار کیا گیا۔

ملاقات کے دوران وزیر اعظم شہباز شریف نے پاکستان اور یورپی یونین کے درمیان دیرینہ تعلقات کو سراہتے ہوئے کہا کہ یورپی یونین پاکستان کا ایک اہم اور قابل اعتماد تجارتی شراکت دار ہے۔ انہوں نے جی ایس پی پلس (GSP+) اسکیم کے تحت حاصل ہونے والے معاشی فوائد کا ذکر کرتے ہوئے کہا کہ یہ اسکیم دونوں فریقوں کے لیے باہمی فائدے کا ذریعہ بنی ہے اور پاکستان اس پروگرام کے تسلسل کے لیے پُرعزم ہے۔

وزیر اعظم نے ڈاکٹر رینا کیونکا کی سفارتی خدمات کو خراجِ تحسین پیش کرتے ہوئے 2022 کے تباہ کن سیلاب کے دوران یورپی یونین کی جانب سے فراہم کی گئی امداد کو یقینی بنانے میں ان کے کردار کو بھی سراہا۔ انہوں نے یورپی کمیشن کی صدر ارسلا وان ڈیر لیین کے لیے نیک خواہشات کا اظہار کیا اور کہا کہ وہ مستقبل قریب میں ان سے ملاقات کے منتظر ہیں۔

ڈاکٹر رینا کیونکا نے پاکستان میں اپنے قیام کے دوران حکومت کی جانب سے ملنے والے بھرپور تعاون پر شکریہ ادا کیا۔ انہوں نے کہا کہ یورپی یونین پاکستان کے ساتھ اپنے تعلقات کو مزید وسعت دینے اور مختلف شعبوں میں تعاون کو مضبوط بنانے کے لیے پُرعزم ہے۔ انہوں نے یہ بھی بتایا کہ وہ برسلز میں اپنی نئی اسائنمنٹ کے دوران پاک-یورپی تعلقات کو مزید فروغ دینے کے لیے کام کرتی رہیں گی۔

یہ ملاقات پاکستان اور یورپی یونین کے درمیان بڑھتے ہوئے دوستانہ تعلقات اور مستقبل میں مزید اشتراکِ عمل کی امید کی نوید دیتی ہے۔