حکومت ڈاکٹر عافیہ صدیقی کے معاملے میں کسی طور غافل نہیں، وزیرِ اعظم شہباز شریف

اسلام آباد: وزیراعظم محمد شہباز شریف نے کہا ہے کہ حکومت ڈاکٹر عافیہ صدیقی کے معاملے میں کسی بھی طور غفلت کا مظاہرہ نہیں کر رہی، اور اس سلسلے میں وزیر قانون کی سربراہی میں ایک اعلیٰ سطحی کمیٹی تشکیل دے دی گئی ہے، جو ڈاکٹر فوزیہ صدیقی سے مسلسل رابطے میں رہتے ہوئے تمام ممکنہ قانونی اور سفارتی اقدامات پر عمل کرے گی۔

یہ بات وزیراعظم ہاؤس میں ڈاکٹر عافیہ صدیقی کی ہمشیرہ ڈاکٹر فوزیہ صدیقی سے ملاقات کے دوران کہی گئی۔ ملاقات میں وزیراعظم نے یقین دہانی کرائی کہ حکومت، ڈاکٹر عافیہ صدیقی کی رہائی کے لیے ہر ممکن قانونی اور سفارتی مدد فراہم کرے گی۔ ان کا کہنا تھا کہ ماضی میں بھی حکومت پاکستان اس حساس مسئلے پر بین الاقوامی سطح پر اپنی کوششیں جاری رکھے ہوئے ہے، اور وہ خود بھی امریکی صدر جو بائیڈن کو خط لکھ چکے ہیں۔

وزیراعظم نے ڈاکٹر فوزیہ صدیقی کے جذبے اور کوششوں کو سراہتے ہوئے کہا کہ حکومت ان کے شانہ بشانہ کھڑی ہے اور تمام وسائل بروئے کار لائے جائیں گے۔

 اس کے قبل ، وزیراعظم شہباز شریف سے یورپی یونین کی سفیر ڈاکٹر رینا کیونکا نے بھی ملاقات کی، جس میں دو طرفہ تعلقات، باہمی تعاون اور مستقبل کی حکمت عملی پر تبادلہ خیال کیا گیا۔ وزیراعظم نے ڈاکٹر رینا کیونکا کی سفارتی خدمات کو سراہتے ہوئے کہا کہ اُنہوں نے پاکستان اور یورپی یونین کے تعلقات کو نئی جہت دی ہے۔

وزیراعظم نے 2022 کے تباہ کن سیلاب کے دوران یورپی یونین کی جانب سے فراہم کی گئی امداد اور تعاون پر بھی شکریہ ادا کیا۔ انہوں نے کہا کہ یورپی یونین کی بروقت مدد نے پاکستان کو ایک مشکل وقت میں سنبھلنے میں مدد دی۔

ڈاکٹر رینا کیونکا نے اپنے قیام کے دوران ملنے والے بھرپور تعاون پر پاکستانی حکومت کا شکریہ ادا کیا اور کہا کہ وہ برسلز میں اپنی نئی ذمہ داریوں کے دوران بھی پاکستان اور یورپی یونین کے تعلقات کو مزید فروغ دینے کے لیے کام کرتی رہیں گی۔