سرد جنگ کے بعد پہلی بار: برطانیہ ایٹمی ہتھیاروں سے لیس جنگی طیارے حاصل کرے گا

لندن : بدلتی ہوئی عالمی صورتحال اور روسی خطرات کے پیش نظر، برطانیہ نے فیصلہ کیا ہے کہ وہ جدید F-35A لڑاکا طیارے حاصل کرے گا جو امریکی B61 ٹیکٹیکل ایٹمی ہتھیاروں کو فائر کرنے کی صلاحیت رکھتے ہیں۔ یہ اقدام برطانوی فضائیہ کو سرد جنگ کے بعد پہلی بار ایٹمی فضائی صلاحیت فراہم کرے گا۔

ڈاؤننگ سٹریٹ سے جاری بیان کے مطابق، حکومت 12 F-35A طیارے خرید رہی ہے، جو لاک ہیڈ مارٹن کے تیار کردہ جدید ترین اسٹیلتھ جیٹس ہیں۔ برطانوی وزیراعظم کیئر اسٹارمر نے اس اقدام کو "قومی سلامتی میں اہم سرمایہ کاری" قرار دیا۔

ان کا کہنا تھا کہ دنیا اس وقت عدم استحکام کا شکار ہے، اور ایسے حالات میں امن کو معمولی نہیں سمجھا جا سکتا۔ یہ فیصلہ روس کی جارحیت، یوکرین جنگ اور امریکہ کی یورپی سلامتی میں روایتی دلچسپی میں کمی جیسے عوامل کو مدنظر رکھ کر کیا گیا ہے۔

یہ طیارے نہ صرف نیٹو کی دفاعی حکمت عملی کو تقویت دیں گے بلکہ برطانوی دفاعی صنعت کو بھی سہارا دیں گے، کیونکہ اس منصوبے سے تقریباً 20,000 ملازمتیں پیدا ہونے کا تخمینہ ہے۔

ماہرین کے مطابق برطانیہ کا یہ اقدام مستقبل میں یورپ میں ایٹمی توازن پر گہرے اثرات ڈال سکتا ہے، خاص طور پر اس وقت جب نیٹو اتحادی ممالک دفاعی تیاریوں میں اضافہ کر رہے ہیں۔