پاک چین آہنی دوستی خارجہ پالیسی کا بنیادی ستون، سی پیک کا ملکی ترقی میں انقلابی کردار، وزرائے اعظم کی ملاقات میں عزم کا اعادہ

بیجنگ :وزیراعظم شہباز شریف کا دورۂ چین انتہائی کامیابی کے ساتھ آگے بڑھ رہا ہے، جس کے مقتدر مرحلے میں انہوں نے بیجنگ میں اپنے چینی ہم منصب لی کیانگ سے تفصیلی ملاقات کی ہے۔ اس اہم ملاقات میں دونوں ممالک نے ایک دوسرے کے بنیادی قومی مفادات سے متعلق تمام امور پر غیر مشروط اور مخلصانہ حمایت جاری رکھنے کے عزم کا اعادہ کیا۔

ملاقات کے دوران پاک چین تعلقات کے تمام پہلوؤں کا احاطہ کیا گیا، جہاں دونوں رہنماؤں نے اس بات پر مکمل اتفاق کیا کہ چین پاکستان اقتصادی راہداری (CPEC) نے پاکستان کی سماجی و اقتصادی ترقی میں ہمیشہ ایک انقلابی اور کلیدی کردار ادا کیا ہے۔ دونوں وزرائے اعظم نے پاکستان اور چین کے مابین سیاسی، اقتصادی، اسٹریٹجک، سکیورٹی اور عوامی روابط کے شعبوں میں دوطرفہ تعاون کی موجودہ رفتار پر گہرے اطمینان کا اظہار کیا۔

اس موقع پر وزیراعظم شہباز شریف نے گفتگو کرتے ہوئے واضح کیا کہ چین کے ساتھ دیرینہ اسٹریٹجک تعاون پر مبنی شراکت داری پاکستان کی خارجہ پالیسی کا بنیادی ستون ہے۔ انہوں نے اس عزم کو دہرایا کہ پاک چین آہنی دوستی لازوال باہمی اعتماد، گہرے اسٹریٹجک تعاون اور خطے میں مستقل امن، ترقی اور خوشحالی کے مشترکہ نظریے پر مبنی ہے، جو وقت کی ہر لہر کے ساتھ مزید مضبوط ہوتی جائے گی۔