پنجاب میں فضائی آلودگی کا وبال، لاہور دنیا کے آلودہ ترین شہروں میں سرفہرست

لاہور: پنجاب میں فضائی آلودگی کی صورتحال میں شدت آتی جا رہی ہے، اور لاہور دنیا کے سب سے آلودہ ترین شہروں میں ایک بار پھر سرفہرست رہا ہے۔ شہر کا ایئر کوالٹی انڈیکس (AQI) 363 تک پہنچ گیا، جس نے شہریوں کے لئے صحت کے شدید خطرات پیدا کر دیے ہیں۔

دنیا کے دوسرے سب سے آلودہ شہر کا اعزاز بھارتی دارالحکومت دہلی کو حاصل ہوا، جہاں AQI 232 ریکارڈ کیا گیا۔ تاہم، پاکستان میں سب سے زیادہ مضر صحت فضاء فیصل آباد کی ہے، جہاں AQI کا شمار 539 تک پہنچ گیا۔

ماہرین نے اس صورتحال کو انسانوں کی صحت کے لئے خطرناک قرار دیتے ہوئے ایڈوائزری جاری کی ہے، جس میں کہا گیا ہے کہ بوڑھے اور بیمار افراد اس آلودگی سے سب سے زیادہ متاثر ہو سکتے ہیں۔ شہریوں کو ماسک کے استعمال اور احتیاطی تدابیر اختیار کرنے کی ہدایت کی گئی ہے تاکہ سانس کی بیماریوں، دل کے مسائل اور دیگر خطرات سے بچا جا سکے۔

طبی ماہرین نے مزید کہا کہ اس فضائی آلودگی کے طویل مدتی اثرات نہ صرف موجودہ بلکہ آنے والی نسلوں کی صحت پر بھی گہرے اثرات ڈال سکتے ہیں، جس کے پیش نظر حکومت اور متعلقہ اداروں سے فوری اقدامات کی ضرورت ہے۔