پاکستان کا ٹی 20 ورلڈ کپ میں شرکت کرنے یا نہ کرنے کا فیصلہ آج ہوگا

لاہور : پاکستان کرکٹ بورڈ (پی سی بی) کے چیئرمین محسن نقوی آج وزیراعظم شہباز شریف سے ملاقات کریں گے، جس میں ٹی 20 ورلڈ کپ میں پاکستان کی شرکت یا عدم شرکت کا حتمی فیصلہ کیا جائے گا۔ ذرائع کے مطابق، وزیراعظم کی ہدایت پر یہ فیصلہ کیا جائے گا کہ پاکستان اس ایونٹ میں شرکت کرے گا یا نہیں۔

چیئرمین پی سی بی محسن نقوی نے قومی کرکٹرز سے گفتگو کرتے ہوئے کہا کہ بنگلہ دیش کرکٹ بورڈ کا موقف اصولوں پر مبنی ہے اور ہم نے کرکٹ کے سنہری اصولوں کو مدنظر رکھتے ہوئے بنگلہ دیش کی حمایت کی ہے۔ ان کا کہنا تھا کہ پاکستان کے کھلاڑی باصلاحیت ہیں اور کامیابی ہمیشہ ٹیم ورک سے حاصل ہوتی ہے۔ محسن نقوی نے مزید کہا کہ سیاست زدہ کرکٹ کسی کے مفاد میں نہیں آتی، اور پاکستان کرکٹ ٹیم کے فیصلے پر حکومت پاکستان کی ہدایات کے مطابق عمل کیا جائے گا۔

دوسری جانب، انٹرنیشنل کرکٹ کونسل (آئی سی سی) نے بنگلہ دیش کو ٹی 20 ورلڈ کپ سے باہر کرنے کا اعلان کرتے ہوئے اس کی جگہ سکاٹ لینڈ کو ایونٹ میں شامل کرنے کا فیصلہ کیا ہے۔ اس فیصلے کے بعد، پاکستان کے لیے ورلڈ کپ میں شرکت یا نہ کرنے کا فیصلہ مزید اہمیت اختیار کر گیا ہے۔

ٹی 20 ورلڈ کپ کا آغاز 7 فروری سے سری لنکا میں ہوگا، جہاں پاکستان کے میچز شیڈولڈ ہیں۔ اس حوالے سے پاکستان کرکٹ ٹیم کے مداحوں کی نظریں آج ہونے والے فیصلے پر مرکوز ہیں۔