یورپی ملک مالٹا نے اگلے ماہ فلسطینی ریاست کو تسلیم کرنے کا اعلان کردیا

ویلیٹا: مالٹا کے وزیر اعظم رابرٹ ابیلا نے اعلان کیا ہے کہ ملک 20 جون 2025 کو فلسطینی ریاست کو باضابطہ طور پر تسلیم کر لے گا۔ یہ فیصلہ فلسطینی خودمختاری کے حوالے سے مالٹا کی حمایت کو مضبوط کرتا ہے۔

رابرٹ ابیلا نے مزید کہا کہ فرانس بھی جون میں فلسطینی ریاست کو تسلیم کرنے کا ارادہ رکھتا ہے اور دونوں ممالک سعودی عرب کے تعاون سے دو ریاستی حل پر ایک مشترکہ کانفرنس منعقد کریں گے۔

مالٹا نے پہلے بھی اپریل 2023 میں اقوام متحدہ کی سلامتی کونسل میں فلسطین کو مکمل رکنیت دینے کے حق میں ووٹ دیا تھا، لیکن اب تک فلسطینی ریاست کو رسمی طور پر تسلیم نہیں کیا تھا۔

اقوام متحدہ کے 193 رکن ممالک میں سے اب تک 147 نے فلسطین کو ایک خودمختار ریاست کے طور پر تسلیم کیا ہے۔ حالیہ برسوں میں کئی یورپی اور عالمی ممالک جیسے آئرلینڈ، ناروے، اسپین اور جمیکا بھی اس فہرست میں شامل ہو چکے ہیں۔

لیکن امریکہ، برطانیہ، آسٹریلیا اور جرمنی جیسے بڑے ممالک اب تک فلسطینی ریاست کو تسلیم کرنے سے گریزاں ہیں۔ اس حوالے سے گزشتہ ماہ فرانس کے صدر ایمانویل میکرون نے کہا تھا کہ فرانس جلد اس بارے میں فیصلہ کر سکتا ہے۔