قراقرم : شدید بارشوں اور لینڈ سلائیڈنگ کے نتیجے میں شاہراہ قراقرم مختلف مقامات پر بند ہو گئی ہے، جس کے باعث گلگت بلتستان اور اسلام آباد آنے جانے والے سینکڑوں مسافر پھنس گئے ہیں۔ خیبر پختونخوا اور گلگت بلتستان کے شمالی علاقہ جات میں برفباری اور بارشوں کا سلسلہ جاری ہے، جس کے نتیجے میں علاقے میں نظام زندگی مفلوج ہو گیا ہے۔
اطلاعات کے مطابق، قراقرم ہائی وے داسو اور دیامر کے درمیان دو مختلف مقامات پر بند ہو گئی ہے، اور سڑک کو دوبارہ کھولنے کے لیے کام جاری ہے۔ دیامر پولیس کے ترجمان نے بتایا کہ بالائی کوہستان کے علاقے لوتر میں سڑک ابھی تک بند ہے، تاہم بھاشا سے رائے کوٹ سیکشن کو کھول دیا گیا ہے، جو گزشتہ رات لینڈ سلائیڈنگ کے سبب بند ہو گیا تھا۔
