لاہور: چیئرمین پاکستان تحریک انصاف (پی ٹی آئی) عمران خان نے کہا ہے کہ مجھے 4 لوگ جو مارنا چاہتے تھے ان کے ساتھ زرداری بھی تھا ۔ آصف زرداری نے دہشتگرد تنظیم کو مجھے مارنے کیلئے پیسہ دیا ، اب ان کا پلان سی بنا ہوا ہے آصف زرداری اس کے پیچھے ہے ۔
اپنے خطاب میں عمران خان نے کہا کہ سب سے بڑی جماعت کے سربراہ اور سابق وزیراعظم کو مارنے کی کوشش کی گئی ۔ میرے خلاف سندھ حکومت کا لوٹا ہوا پیسہ استعمال کیا جارہا ہے ۔ آصف زرداری نے سندھ حکومت کا لوٹا ہوا پیسہ ایک دہشتگرد تنظیم کو دیا ۔
انہوں نے مزید کہا کہ نگراں حکومت کے نام پر ہمارے مخالفین کو لاکر بٹھا دیا گیا ۔ ایسے لوگوں کو لگا دیا جو ہمارے خلاف کارروائیاں کر رہے ہیں ۔ نگراں حکومت نے آتے ہی ہمارے ترقیاتی کام بند کرا دیئے ۔ نگراں حکومت نے آتے ہی مجھ پر حملے کی تحقیقات کرنے والی جے آئی ٹی کو بند کردیا ۔
چیئرمین پی ٹی آئی نے کہا کہ اس وقت ملک پر زرداری اور شہباز شریف خاندان مسلط ہے ۔ مہنگائی سے زرداری اور شہباز شریف کو کیا فرق پڑتا ہے ان کا پیسہ باہر ہے ۔ ان کے پاس غلطی سدھارنے کا ایک ہی طریقہ تھا کہ ملک میں شفاف الیکشن کراتے ۔ شفاف الیکشن کی طرف جانے کے بجائے پاکستان مزید دلدل میں دھنستا جارہا ہے ۔ اسحاق ڈار معیشت کو وہاں لے گیا ہے جہاں پاکستان کی سلامتی کو خطرہ ہے ۔
