پنجاب حکومت کا سیلز ٹیکس آن سروسز ایکٹ میں بڑی ترمیم کا فیصلہ، تمام سروسز کو ٹیکس کے دائرے میں لانے کی تیاری

لاہور: پنجاب حکومت نے پنجاب سیلز ٹیکس آن سروسز ایکٹ 2012 میں ترمیم کا فیصلہ کر لیا ہے۔
نمائندہ نیونیوز  لاہور وقاص غوری  کے مطابق   حکومت نے "پازیٹو لسٹ" کے نظام کی بجائے "نیگیٹو لسٹ" نظام متعارف کرانے کا منصوبہ بنایا ہے، جس کے تحت تمام سروسز ٹیکس کے دائرے میں آئیں گی، سوائے ان کے جو پہلے شیڈول میں مستثنیٰ ہوں گی۔

مجوزہ ترمیم کے مطابق پہلے شیڈول میں ٹیکس فری سروسز اور دوسرے شیڈول میں ٹیکس ایبل سروسز درج ہوں گی۔ ایکٹ کی سیکشن 3 میں تبدیلی کے ساتھ سیکشن اےتھری شامل کی گئی ہے، جس کے تحت ٹیکس فری سروسز کی وضاحت کی گئی ہے۔

ترمیم کے تحت ان پٹ ٹیکس کریڈٹ کے اصولوں میں نئی پابندیاں شامل کی جا سکتی ہیں، اور ٹیلی کام، ٹرانسپورٹ اور دیگر سروسز پر ان پٹ ٹیکس کریڈٹ کی حد مقرر کی جا سکے گی۔ اس کے علاوہ تجارتی املاک کے کرایے کو بھی ٹیکس کے دائرے میں لانے کی تجویز ہے، اور پنجاب حکومت کو نئے شیڈولز میں ردوبدل کرنے کا اختیار بھی دیا گیا ہے۔

مجوزہ ترامیم کی پنجاب اسمبلی سے منظوری کے بعد نافذ کرنے کی منصوبہ بندی کی گئی ہے۔