صنعتی ادارے اور ورکرز حفاظتی اصولوں کی پابندی یقینی بنائیں: وزیراعلیٰ پنجاب مریم نواز

لاہور : وزیراعلیٰ پنجاب مریم نواز شریف نے ورک پلیس پر تحفظ اور صحت کے عالمی دن کے موقع پر کہا کہ صنعتی اداروں اور کام کرنے والے ورکرز کو حفاظتی اصولوں کی پابندی کو یقینی بنانا چاہیے۔ انہوں نے کہا کہ ہر ورکر کا حق ہے کہ وہ ایک محفوظ اور صحت مند ماحول میں کام کرے، اور یہ ادارے کی ترقی اور کامیابی کے لیے ضروری ہے۔

مریم نواز نے کہا کہ محفوظ ورک پلیس نہ صرف معیشت کی ترقی بلکہ خوشحال معاشرے کی بنیاد بھی ہے۔ انہوں نے پنجاب حکومت کی جانب سے ورکرز کی فلاح و بہبود کے لیے کیے گئے اقدامات کی تفصیلات بیان کی اور کہا کہ ورکرز کی عزت، صحت اور تحفظ کو ترجیح دی جا رہی ہے۔

وزیراعلیٰ نے اس بات پر زور دیا کہ کام کرنے والے افراد کے لیے ایک ایسا کلچر فروغ دینا ضروری ہے، جہاں ہر فرد کی جان اور صحت مقدم ہو۔ اس کے ساتھ ہی انہوں نے کہا کہ ہمیں سب کو یکجا ہو کر کام کی جگہوں کو محفوظ، صحت مند اور خوشحال بنانے کے مشن میں اپنا کردار ادا کرنا ہوگا۔

مریم نواز شریف نے مزید کہا کہ آج کا دن ملازمت کے مقامات پر ممکنہ خطرات اور حادثات سے آگاہی پیدا کرنے کا دن ہے۔ انہوں نے عالمی یوم پیشہ ورانہ سلامتی اور صحت 2025ء کے تھیم "حفاظت اور صحت کے لیے آرٹیفیشل انٹیلی جنس اور ڈیجیٹائزیشن کا انقلابی کردار" پر بھی روشنی ڈالی۔