اے آئی اور ڈیجیٹلائزیشن سے کام کی جگہوں پر انقلاب ممکن ہے، وزیراعظم شہباز شریف

اسلام آباد :  وزیراعظم محمد شہباز شریف نے کہا ہے کہ مصنوعی ذہانت (AI) اور ڈیجیٹلائزیشن کے ذریعے کام کی جگہوں پر انقلابی تبدیلیاں ممکن ہیں، جو نہ صرف حادثات کی روک تھام میں مددگار ثابت ہوں گی بلکہ کارکنوں کے لیے محفوظ، صحت مند اور مؤثر ماحول کی فراہمی کو بھی یقینی بنائیں گی۔

 "کام کرنے کی جگہوں پر حفاظت اور صحت" کے عالمی دن کے موقع پر اپنے خصوصی پیغام میں  وزیراعظم نے کہا کہ پاکستان، پیشہ ورانہ حادثات اور بیماریوں کی روک تھام کے لیے عالمی برادری کے ساتھ مل کر کام کرنے کے لیے پرعزم ہے اور محنت کشوں کی فلاح و بہبود کو اولین ترجیح دیتا ہے۔

اس سال کے عالمی دن کا موضوع "صحت اور حفاظت میں انقلاب ،  کام میں AI اور ڈیجیٹلائزیشن کا کردار" ہے، جو موجودہ دور کی تیز رفتار تکنیکی ترقی کے تناظر میں نئے چیلنجز اور مواقع کی نشاندہی کرتا ہے۔

وزیراعظم نے اس بات پر زور دیا کہ جیسے جیسے پاکستان اور دنیا بھر میں ڈیجیٹل سسٹمز کام کی جگہوں کا لازمی جزو بن رہے ہیں، یہ ضروری ہے کہ ان ٹیکنالوجیز کو انسانی وقار، تحفظ اور صحت کے تقاضوں کے مطابق استعمال کیا جائے۔ انہوں نے کہا کہ جدید سمارٹ ٹیکنالوجیز کی مدد سے خطرات کی بروقت شناخت ممکن ہو گئی ہے، جس سے حادثات کی روک تھام اور کام کی جگہوں کو محفوظ بنانے میں خاطر خواہ مدد ملی ہے۔

وزیراعظم نے اعلان کیا کہ حکومت پاکستان ایک جامع قانونی و پالیسی فریم ورک تشکیل دینے کے لیے کوشاں ہے، جو کارکنوں کے بنیادی حقوق کے تحفظ کو یقینی بنائے گا۔ انہوں نے آجروں، محنت کشوں، پالیسی سازوں اور تکنیکی ماہرین پر زور دیا کہ وہ مل کر ایک ایسا مستقبل تعمیر کریں جہاں ٹیکنالوجی اور انسانی اقدار ہم آہنگی کے ساتھ ترقی کریں۔

وزیراعظم کے اس وژن کو صنعتی، سرکاری اور سول سوسائٹی حلقوں کی جانب سے سراہا گیا ہے، جو اس بات کی علامت ہے کہ پاکستان محنت کشوں کی بہتری کے لیے جدید تقاضوں کے مطابق سنجیدہ اقدامات کرنے کے لیے تیار ہے۔