اسلام آباد ہائیکورٹ کے 3 ججز کے تبادلوں کی منظوری:جوڈیشل کمیشن کا اعلامیہ جاری

اسلام آباد: چیف جسٹس آف پاکستان، جسٹس یحییٰ آفریدی کی زیرِ صدارت جوڈیشل کمیشن کے اجلاس کا اعلامیہ جاری کر دیا گیا ہے، جس میں اسلام آباد ہائیکورٹ کے تین جج صاحبان کو دیگر صوبوں کی ہائیکورٹس میں منتقل کرنے کا بڑا فیصلہ کیا گیا ہے۔
جوڈیشل کمیشن کے ارکان نے کثرتِ رائے سے ججز کے تبادلوں کی منظوری دی ہے۔ اعلامیے کے مطابق      جسٹس محسن اختر کیانی کو لاہور ہائیکورٹ منتقل کرنے کی منظوری دی گئی ہے۔     جسٹس بابر ستار کا تبادلہ پشاور ہائیکورٹ کر دیا گیا ہے۔    جسٹس ثمن رفعت امتیاز کو سندھ ہائیکورٹ میں تعینات کرنے کی سفارش کی گئی ہے۔
اجلاس میں اہم فیصلہ کرتے ہوئے جسٹس ارباب محمد طاہر اور جسٹس خادم حسین سومرو کے تبادلے کی سابقہ سفارشات کو واپس لے لیا گیا ہے، جس کے بعد وہ اسلام آباد ہائیکورٹ میں ہی اپنی خدمات جاری رکھیں گے۔ خبر کے مطابق، اس فیصلے سے قبل اسلام آباد ہائیکورٹ کے جسٹس بابر ستار نے چیف جسٹس یحییٰ آفریدی کو ایک خط ارسال کیا تھا۔ انہوں نے اپنے خط میں موقف اختیار کیا کہ ان کے تبادلے کے حوالے سے کوئی بھی حتمی فیصلہ کرنے سے پہلے انہیں سنا جائے اور ان کا موقف ریکارڈ کا حصہ بنایا جائے۔

کمیشن نے تمام پہلوؤں کا جائزہ لینے کے بعد کثرتِ رائے سے تبادلوں کے اس اعلامیے کی منظوری دے دی ہے۔