جنوبی میکسیکو میں ٹرین کے پٹری سے اترنے کا افسوسناک حادثہ، 13 افراد ہلاک، متعدد زخمی

میکسیکو سٹی: جنوبی میکسیکو میں ایک افسوسناک ٹرین حادثے میں کم از کم 13 افراد ہلاک اور متعدد زخمی ہو گئے ہیں۔ یہ حادثہ ریاست اوساکا اور ویرا کروز کو ملانے والی ریلوے لائن پر پیش آیا، جس کے بعد علاقے میں ہنگامی صورتِ حال نافذ کر دی گئی۔

حکام کے مطابق، حادثے کے وقت ٹرین میں 241 مسافر سفر کر رہے تھے، جبکہ عملے کے 9 ارکان بھی ٹرین میں موجود تھے۔ اچانک پیش آنے والے اس واقعے کے دوران ٹرین کی کئی بوگیاں پٹری سے اتر کر ایک دوسرے پر چڑھ گئیں، جس کے نتیجے میں بھاری جانی نقصان ہوا۔ حادثے کی اطلاع ملتے ہی ریسکیو ادارے، مقامی پولیس اور طبی ٹیمیں فوراً موقع پر پہنچ گئیں اور امدادی کارروائیاں شروع کر دیں۔

ریسکیو حکام نے زخمیوں کو قریبی ہسپتالوں میں منتقل کرنے کے لیے امدادی کارروائیاں کیں، جبکہ شدید زخمی افراد کو خصوصی طبی سہولتیں فراہم کی گئیں۔ جائے حادثہ پر ایمبولینسز، فائر بریگیڈ اور سول ڈیفنس کے اہلکار بھی پہنچ گئے اور ملبے میں پھنسے افراد کو نکالنے کی کوششیں کیں۔ بعض مسافروں کی حالت تشویشناک بتائی جا رہی ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔

ابتدائی اطلاعات کے مطابق، حادثے کی ممکنہ وجوہات میں ٹریک کی خرابی یا تکنیکی نقص شامل ہو سکتی ہے، تاہم حکام کا کہنا ہے کہ واقعے کی مکمل تحقیقات کا آغاز کر دیا گیا ہے۔ میکسیکو کی وفاقی حکومت اور متعلقہ ریلوے حکام نے حادثے پر گہرے دکھ اور افسوس کا اظہار کیا ہے اور جاں بحق افراد کے لواحقین کے لیے امدادی پیکج کا اعلان بھی متوقع ہے۔ 

حادثے کے بعد اس ریلوے روٹ پر ٹرین سروس عارضی طور پر معطل کر دی گئی ہے، اور مسافروں کو متبادل سفری سہولتیں فراہم کی جا رہی ہیں۔