تہران : اسرائیل کے وزیرِ اعظم نیتن یاہو کے لیے نیک تمناؤں کا اظہار کرنے والی اداکارہ کو ایران میں گرفتار کر لیا گیا۔
غیر ملکی میڈیا کے مطابق اداکارہ شہرہ قمر کو اسرائیلی وزیرِ اعظم کے لیے نیک تمناؤں کا اظہار کرنے کے بعد معاشرے میں نفسیاتی عدم تحفظ پیدا کرنے کے الزام میں گرفتار کیا گیا ہے۔
رپورٹس کے مطابق اداکارہ کی جانب سے چند دن قبل سوشل میڈیا (انسٹاگرام) پر اسرائیلی وزیرِ اعظم کی صحت یابی کے لیے دعا پوسٹ کی گئی تھی۔
اداکارہ نے نیتن یاہو کی تصویر لگاتے ہوئے لکھا تھا کہ میں آپ کی صحت کے لیے دعاگو ہوں، آپ سلامت رہیں۔ غیر ملکی میڈیا کے مطابق اداکارہ کے انسٹاگرام پر 40 لاکھ فالوورز ہیں۔
واضح رہے کہ گزشتہ ہفتے اسرائیل کے وزیرِ اعظم نیتن یاہو کے دل کی سرجری کر کے انہیں پیس میکر لگایا گیا تھا۔
