لیبیا: مشرقی ساحل پر تارکین وطن کی کشتی ڈوب گئی، 18 افراد ہلاک اور 50 لاپتہ

لیبیا:لیبیا کے مشرقی ساحلی علاقے میں تارکین وطن کی کشتی ڈوبنے سے افسوسناک واقعہ پیش آیا، جس میں 18 افراد ہلاک ہوگئے اور 50 افراد ابھی تک لاپتہ ہیں۔ تاہم، 10 افراد کو زندہ بچا لیا گیا۔

بین الاقوامی ادارہ برائے مہاجرین (IOM) کے مطابق، یہ حادثہ لیبیا کے ساحلی شہر طبرق کے قریب پیش آیا، جو مصر کی سرحد کے قریب واقع ہے۔ کشتی پر سوار افراد یورپ جانے کے لیے سمندر کا خطرناک سفر کر رہے تھے۔

غیر ملکی ذرائع ابلاغ کے مطابق، لیبیا حالیہ برسوں میں یورپ جانے والے تارکین وطن کے لیے ایک اہم راستہ بن چکا ہے، اور یہاں سے اکثر افراد سمندری سفر کے ذریعے یورپ کی طرف روانہ ہوتے ہیں۔

یہ پہلا واقعہ نہیں ہے، اس سے قبل بھی لیبیا میں متعدد کشتی حادثات رونما ہو چکے ہیں۔ گزشتہ ماہ بھی دو مختلف کشتیوں کے حادثات میں 60 تارکین وطن جان کی بازی ہار گئے تھے۔

یہ واقعات اس بات کی نشاندہی کرتے ہیں کہ تارکین وطن کے لیے لیبیا میں سمندری سفر انتہائی خطرناک ثابت ہو رہا ہے، اور ان حادثات نے انسانی زندگی کے تحفظ کے لیے مزید اقدامات کی ضرورت کو اجاگر کیا ہے۔