وزیراعلیٰ مریم نواز شریف کی امریکی سرمایہ کاروں کو پنجاب میں سرمایہ کاری کی دعوت

لاہور :  وزیراعلیٰ پنجاب مریم نواز شریف نے امریکی سرمایہ کاروں کو پنجاب میں سرمایہ کاری کے لیے شاندار مواقع فراہم کرنے کی دعوت دی ہے۔ یہ بیان انہوں نے امریکی قونصل جنرل سٹیٹسن سینڈرس سے ملاقات کے دوران دیا۔ امریکی قونصل جنرل نے وزیراعلیٰ کو پرتپاک مہمان نوازی پر شکریہ ادا کیا، اور اس ملاقات میں امریکہ کے نئے پولیٹیکل اور اکنامک آفیسر کا بھی تعارف کرایا۔

مریم نواز شریف نے کہا کہ پاکستان اور امریکہ کے تعلقات میں بہتری خوش آئند ہے اور وزیراعظم شہباز شریف کا حالیہ دورہ امریکہ دونوں ممالک کے تعلقات میں مزید استحکام لائے گا۔ انہوں نے کہا کہ موجودہ تعلقات نئی بلندیوں کو چھو رہے ہیں۔

وزیراعلیٰ پنجاب نے امریکی سرمایہ کاروں کو پنجاب میں موجودہ کاروباری مواقع سے فائدہ اٹھانے کی دعوت دی۔ انہوں نے اس بات کا بھی ذکر کیا کہ پنجاب نے حالیہ تاریخ کے بدترین سیلاب کا سامنا کیا، لیکن حکومتی اقدامات اور بحالی کے کاموں کی بدولت متاثرین کے لیے امداد اور ریسکیو آپریشن کامیابی سے مکمل ہوئے ہیں۔

مریم نواز نے پنجاب میں کلچرل ٹورازم کے فروغ کے لیے قدیمی ثقافتی ورثے کی بحالی اور بہتری کی ضرورت پر زور دیا، اور کہا کہ پنجاب کا تاریخی اور مذہبی ثقافتی ورثہ عالمی سطح پر ٹورازم کے لیے اہم موقع فراہم کرتا ہے۔

انہوں نے مزید کہا کہ حکومت پنجاب کے خواتین کے ایمپاورمنٹ پراجیکٹس کامیابی سے جاری ہیں، اور لاہور سمیت دیگر شہروں میں ایئر کوالٹی میں بہتری آ رہی ہے، خاص طور پر ماحول دوست پراجیکٹس اور سموگ کے اثرات کو کم کرنے کے اقدامات کے باعث۔

امریکی قونصل جنرل نے وزیراعلیٰ پنجاب کے ای بزنس پراجیکٹ کو سراہا اور کہا کہ اس کی مدد سے سرمایہ کاروں کے لیے کاروبار شروع کرنا آسان ہو گیا ہے۔ انہوں نے پنجاب میں جاری ترقیاتی کاموں کی رفتار اور معیار کو بھی تسلیم کیا۔