پاک بحریہ کے بحری دفاع میں تاریخی سنگ میل: پہلی 'ہنگور کلاس' آبدوز بیڑے میں شامل

بیجنگ/ اسلام آباد: پاکستان کے بحری دفاع کو مزید ناقابلِ تسخیر بنانے کے لیے ایک اہم پیش رفت سامنے آئی ہے۔ پاک بحریہ کی پہلی جدید ترین "ہنگور کلاس" آبدوز کی چین میں باقاعدہ کمیشننگ کر دی گئی ہے۔ اس تاریخی تقریب کے مہمانِ خصوصی صدرِ مملکت آصف علی زرداری تھے، جبکہ چیف آف دی نیول اسٹاف ایڈمرل نوید اشرف نے بھی تقریب میں خصوصی شرکت کی۔
تقریب سے خطاب کرتے ہوئے صدر آصف علی زرداری نے کہا کہ ہنگور کلاس آبدوز کی شمولیت پاکستان کے بحری مفادات کے تحفظ کی جانب ایک بڑا قدم ہے۔ انہوں نے واضح کیا کہ  پاکستان اپنی خودمختاری کے دفاع، قومی بحری مفادات کے تحفظ اور اقتصادی راہداریوں کی سلامتی کو یقینی بنانے کی بھرپور صلاحیت رکھتا ہے۔ یہ منصوبہ پاک چین لازوال دوستی اور دفاعی تعاون کا منہ بولتا ثبوت ہے۔
نیول چیف ایڈمرل نوید اشرف نے اس موقع پر آبدوز کی تکنیکی اور اسٹریٹجک اہمیت پر روشنی ڈالتے ہوئے کہا    یہ جدید آبدوزیں دشمن کی کسی بھی جارحیت کو روکنے کے لیے کلیدی کردار ادا کریں گی۔    تجارتی گزرگاہوں کی حفاظت: بحیرہ عرب میں پاکستان کی اہم سمندری تجارتی گزرگاہوں کی سلامتی ان آبدوزوں کی شمولیت سے مزید مستحکم ہوگی۔ ہنگور کلاس آبدوزیں جدید ترین ہتھیاروں اور سینسرز سے لیس ہیں، جو سمندر کے اندر پاک بحریہ کی پہنچ اور طاقت میں کئی گنا اضافہ کر دیں گی۔
ہنگور کلاس آبدوزوں کی تیاری کا منصوبہ پاکستان اور چین کے درمیان دفاعی اشتراک کا حصہ ہے، جس کے تحت کئی آبدوزیں چین میں اور بقیہ پاکستان میں تیار کی جا رہی ہیں۔ ماہرین کے مطابق، ان آبدوزوں کی شمولیت سے خطے میں طاقت کا توازن برقرار رکھنے اور سمندری سرحدوں کی نگرانی میں پاکستان کو واضح برتری حاصل ہوگی۔