"معرکہ حق" میں شکست خوردہ بھارت دہشتگرد گروہوں کے ذریعے ہائبرڈ جنگ کو فروغ دے رہا ہے، فیلڈ مارشل سید عاصم منیر

راولپنڈی : پاکستان آرمی کے سربراہ، فیلڈ مارشل سید عاصم منیر نے بھارت کی جانب سے دہشت گرد گروپوں کی کھلی سرپرستی کی شدید مذمت کی ہے۔ انہوں نے کہا کہ بھارت معرکۂ حق میں شکست کے بعد اپنی پراکسی جنگ کی شدت بڑھا رہا ہے، جس میں "فتنہ الخوارج" اور "فتنہ الہندوستان" جیسے عناصر ملوث ہیں۔

پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل سید عاصم منیر نے 16 ویں نیشنل ورکشاپ بلوچستان میں شرکاء سے خطاب کرتے ہوئے کہا کہ پاکستان کی فوج دہشت گردی کے خاتمے اور بلوچستان کی سماجی و معاشی ترقی کے لیے پرعزم ہے۔ انہوں نے یہ بھی واضح کیا کہ بھارت بلوچستان میں عوام کی حب الوطنی کو نشانہ بنانے کی ناکام کوشش کر رہا ہے اور وہ اپنی ناپاک سازشوں کے ذریعے پاکستان میں عدم استحکام پیدا کرنے کی کوشش کر رہا ہے۔

فیلڈ مارشل نے اس بات پر زور دیا کہ دہشت گردی کا مقابلہ کرنے کے لیے ایک متحد قومی ردعمل کی ضرورت ہے، کیونکہ دہشت گرد کسی مذہب، فرقے یا قومیت کو نہیں دیکھتے۔ ان کا کہنا تھا کہ پاکستان آرمی ہر داخلی یا خارجی خطرے کا بھرپور جواب دینے کے لیے تیار ہے اور ملک کی سلامتی اور قومی وقار کا تحفظ ہر قیمت پر یقینی بنایا جائے گا۔

انہوں نے بلوچستان میں جاری ترقیاتی منصوبوں کے حوالے سے بھی گفتگو کی اور ادارہ جاتی ہم آہنگی اور قومی سطح پر یکجہتی سے چلنے والے ترقیاتی اقدامات کی ضرورت پر زور دیا تاکہ بلوچستان کی ترقی کے ذریعے پاکستان کی مجموعی پیشرفت کو ممکن بنایا جا سکے۔

آخر میں فیلڈ مارشل نے پاکستان کے عزم کا اعادہ کیا کہ پاکستان علاقائی امن کے لیے پرعزم ہے، لیکن ہر خطرے کا بھرپور جواب دینے کے لیے بھی تیار ہے۔

فیلڈ مارشل نے ورکشاپ کے اختتام پر شرکاء کے سوالات کا تفصیلی جواب بھی دیا، جس میں پاکستان کی دفاعی حکمت عملی، بلوچستان کی ترقی اور علاقائی امن کے حوالے سے ان کے خیالات کا تبادلہ ہوا۔