یوٹیوب شارٹس میں گوگل لینز کا نیا فیچر متعارف، ویڈیوز دیکھتے ہوئے اشیاء کی شناخت ممکن

کیلیفورنیا: یوٹیوب نے صارفین کے لیے ایک نیا اور دلچسپ فیچر متعارف کرایا ہے جس کے تحت اب "یوٹیوب شارٹس" ویڈیوز کے دوران گوگل لینز کے ذریعے ویڈیو میں موجود اشیاء، تحریر یا مقامات کے بارے میں فوری معلومات حاصل کی جا سکیں گی۔

یوٹیوب کی جانب سے جاری اعلامیے کے مطابق یہ فیچر فی الحال آزمائشی مرحلے (بیٹا ورژن) میں متعارف کرایا گیا ہے اور تمام صارفین کے لیے دستیاب نہیں ہوگا۔

گوگل لینز ایک جدید شناختی ٹول ہے جو اسکرین یا کیمرے پر موجود کسی بھی چیز کو پہچان کر اس سے متعلق معلومات، تصاویر، ترجمہ یا مقام کی تفصیلات فراہم کرتا ہے۔ اب یہ سہولت یوٹیوب شارٹس میں ضم کی جا رہی ہے۔

صارفین یوٹیوب ایپ پر کوئی شارٹس ویڈیو چلائیں، ویڈیو کو روکیں اور اسکرین کے اوپری حصے میں ظاہر ہونے والے "Lens" بٹن پر ٹیپ کریں۔ اس کے بعد اسکرین پر موجود کسی بھی شے کو منتخب کریں — چاہے وہ دائرہ لگا کر ہو یا صرف ٹیپ کر کے۔ گوگل لینز فوری طور پر اس شے سے متعلق معلومات ویڈیو پر ظاہر کر دے گا۔

یوٹیوب کے مطابق یہ فیچر صارفین کو ویڈیوز کو بہتر طریقے سے سمجھنے، تحریروں کا ترجمہ کرنے اور مقامات کی پہچان میں مدد فراہم کرے گا، جس سے دیکھنے کا تجربہ مزید معلوماتی اور انٹرایکٹو بن جائے گا۔