یوٹیوب نے شارٹس ویڈیوز کے لیے ٹائمر فیچر متعارف کروا دیا

لاہور :  یوٹیوب نے اپنے صارفین کے لیے ایک نیا فیچر متعارف کرایا ہے جو انہیں شارٹس ویڈیوز دیکھنے کے دوران وقت کی نگرانی میں مدد دے گا۔ اس فیچر کے تحت، صارفین روزانہ کی بنیاد پر شارٹس ویڈیوز دیکھنے کے لیے وقت طے کر سکتے ہیں، تاکہ وہ زیادہ دیر تک ایپ میں غرق نہ ہو جائیں۔

یوٹیوب کا "ٹائمر" فیچر صارف کو اس بات کا یاد دلاتا ہے کہ وہ کتنی دیر تک ویڈیوز دیکھ چکے ہیں۔ جب صارف طے شدہ وقت تک پہنچتا ہے، تو ایک پوپ اپ نوٹیفکیشن ظاہر ہوتا ہے، جو اسے کہتا ہے کہ اب شارٹس فیڈ میں اسکرولنگ بند کر دیں۔ اگر صارف چاہے، تو وہ اس نوٹیفکیشن کو نظر انداز کر کے ویڈیوز دیکھنا جاری رکھ سکتا ہے، مگر اس کو یہ شعور ہوگا کہ وہ کتنی دیر سے ایپ استعمال کر رہا ہے۔

یوٹیوب کا یہ فیچر ابھی تک پیرنٹل کنٹرولز کا حصہ نہیں ہے، مگر اگلے سال تک اسے شامل کیا جائے گا۔ اس کے بعد والدین اپنے بچوں کے لیے مخصوص وقت کی حد طے کر سکیں گے اور بچے نوٹیفکیشن کو بند نہیں کر پائیں گے۔

یہ فیچر یوٹیوب کی سیٹنگز میں دستیاب ہوگا، اور ممکنہ طور پر اسے "ریمائنڈ می ٹو ٹیک اے بریک" اور "ریمائنڈ می وین اٹس بیڈ ٹائم" جیسی موجودہ سیٹنگز کے ساتھ جوڑا جائے گا۔یوٹیوب نے اس فیچر کا اجرا شروع کر دیا ہے، اور یہ تمام صارفین کے لیے آئندہ چند ہفتوں میں دستیاب ہو جائے گا۔