امریکہ ایران ممکنہ امن معاہدے کی خبریں، عالمی منڈی میں خام تیل کی قیمتیں یکدم گر گئیں

نیویارک : امریکہ اور ایران کے درمیان بیک چینل رابطوں اور ممکنہ امن معاہدے کی خبروں کے باعث عالمی منڈی میں خام تیل کی قیمتوں پر مثبت اثرات مرتب ہوئے ہیں، جس کے نتیجے میں تیل کی قیمتوں میں نمایاں کمی ریکارڈ کی گئی ہے۔

عالمی تجارتی مارکیٹ سے موصول ہونے والی اطلاعات کے مطابق، دونوں ممالک کے درمیان سفارتی پیش رفت کی افواہوں کے بعد برینٹ کروڈ آئل کی قیمت میں 1.5 فیصد کی کمی دیکھی گئی ہے، جس کے بعد برینٹ کروڈ بانوے ($92) ڈالر فی بیرل کے قریب آ گیا ہے۔

اسی طرح، امریکی مارکیٹ میں بھی مندی کا رجحان رہا اور امریکی خام تیل ویسٹ ٹیکساس انٹرمیڈیٹ (WTI) کی قیمت بھی گر کر اٹھاسی ($88) ڈالر فی بیرل کی سطح پر آ گئی ہے۔

اقتصادی ماہرین کا کہنا ہے کہ امریکہ اور ایران کے درمیان کشیدگی کم ہونے کی صورت میں عالمی مارکیٹ کو تیل کی بلا تعطل سپلائی کی امید پیدا ہوئی ہے، یہی وجہ ہے کہ سرمایہ کاروں کے خدشات کم ہونے سے تیل کی قیمتوں میں گراوٹ کا سلسلہ شروع ہوا ہے۔