پنجاب سیف سٹیز اتھارٹی کو ISO 27001 سرٹیفکیشن حاصل، پاکستان کا پہلا پولیسنگ ادارہ بن گیا

لاہور :  پنجاب سیف سٹیز اتھارٹی (PSCA) نے انفارمیشن سیکیورٹی مینجمنٹ سسٹم کے لیے بین الاقوامی معیار ISO 27001 سرٹیفکیشن حاصل کر لی ہے، جس کے ساتھ ہی یہ پاکستان کا پہلا اور واحد پولیسنگ ادارہ بن گیا ہے جسے یہ عالمی سطح کی سند ملی ہے۔

یہ اہم سنگِ میل پنجاب کو "محفوظ اور سمارٹ سٹی گورننس" کی جانب ایک نمایاں قدم کی حیثیت دیتا ہے، اور قانون نافذ کرنے والے اداروں کے درمیان پنجاب سیف سٹیز اتھارٹی کی قائدانہ حیثیت کو مزید مضبوط کرتا ہے۔

سیف سٹیز اتھارٹی طویل عرصے سے پولیس، ٹریفک کنٹرول اور مجرمانہ سرگرمیوں کی نگرانی میں اہم کردار ادا کر رہی ہے۔ چاہے جرائم کی روک تھام ہو، خطرناک ملزمان کا سراغ لگانا ہو یا ٹریفک قوانین پر عملدرآمد، یہ ادارہ جدید ٹیکنالوجی کے ذریعے ہر محاذ پر متحرک ہے۔

حال ہی میں PSCA نے ایک نیا آن لائن فیچر متعارف کروایا ہے جس کے ذریعے شہری غلط ای چالان کی شکایت درج کر سکتے ہیں۔ اس سہولت کے تحت شہری اپنی چالان کی تفصیلات دیکھ سکتے ہیں، نظرثانی کی درخواست جمع کروا سکتے ہیں، اور شواہد (تصاویر یا ویڈیوز) اپلوڈ کر کے اپنی پوزیشن واضح کر سکتے ہیں۔ اگر شکایت درست ثابت ہو جائے تو چالان منسوخ کر دیا جاتا ہے۔

ادارہ کا مانیٹرنگ سسٹم بھی نہایت فعال ہے، جس کے تحت ضلعی پولیس کو 24/7 CCTV فیڈز مہیا کی جاتی ہیں۔ ضلعی پولیس دفاتر میں قائم کنٹرول رومز کے ذریعے فوری نگرانی اور کارروائی ممکن بنائی جاتی ہے، جبکہ تمام تھانہ انچارجز کو سمارٹ فونز مہیا کیے گئے ہیں تاکہ وہ ریئل ٹائم الرٹس حاصل کر کے فوری ایکشن لے سکیں۔

پنجاب سیف سٹیز اتھارٹی کی کیمروں سے حاصل کردہ ویڈیو شواہد نے عدالتی مقدمات میں بھی پراسیکیوشن کو مضبوط ثبوت فراہم کیے ہیں، جس سے انصاف کی راہ مزید ہموار ہوئی ہے۔

یہ کامیابی صرف ایک ادارے کی پیش رفت نہیں بلکہ پاکستان میں جدید، شفاف اور ٹیکنالوجی پر مبنی حکمرانی کے ایک نئے باب کی شروعات ہے۔