راولپنڈی: چیف آف آرمی سٹاف جنرل سید عاصم منیر نے عید الفطر کے موقع پر جنوبی وزیرستان کے علاقے وانا اور ڈیرہ اسماعیل خان کے چکّن کا دورہ کیا۔ پاک فوج کے شعبہ تعلقات عامہ (آئی ایس پی آر) کے مطابق، آرمی چیف نے مغربی سرحد پر تعینات افسران اور جوانوں کے ساتھ عید منائی اور عید کی نماز ادا کی۔
آرمی چیف نے عید کی نماز کے بعد پاکستان کی سلامتی اور خوشحالی کے لیے دعائیں کی اور جوانوں کی غیر معمولی قربانیوں اور عزم کی تعریف کی۔ انہوں نے کہا، "آپ کی قربانیاں نہ صرف ہمارے ملک کے تحفظ کی ضمانت دیتی ہیں بلکہ آپ کا پاکستان سے گہرا تعلق بھی ظاہر کرتی ہیں۔"
آرمی چیف نے مسلح افواج، قانون نافذ کرنے والے اداروں اور خیبر پختونخوا کے عوام کی کارکردگی کو سراہا اور دہشت گردی کے خلاف ان کی ثابت قدمی کا اعتراف کیا۔ انہوں نے شہداء کی قربانیوں کو خراجِ عقیدت پیش کیا اور کہا کہ امن و استحکام کے قیام کے لیے ان کی جدوجہد ہی ہماری کامیابی کی بنیاد ہے۔
