صدر مملکت، وزیراعظم شہباز شریف کا سید علی گیلانی کی چوتھی برسی پر خراج عقیدت پیش

اسلام آباد: صدر مملکت آصف علی زرداری اور وزیراعظم شہباز شریف نے حریت رہنما سید علی شاہ گیلانی کی چوتھی برسی پر انہیں خراج عقیدت پیش کیا ہے۔ دونوں رہنماؤں نے اپنی اپنی پیغامات میں گیلانی کی زندگی کو کشمیری عوام کی حق خودارادیت کی جدوجہد میں قربانی اور ثابت قدمی کی علامت قرار دیا۔

صدر زرداری نے کہا کہ سید علی گیلانی نے اپنی زندگی بھارتی ظلم و ستم کے باوجود کشمیری عوام کو آزادی کی جدوجہد پر ثابت قدم رکھا اور ان کا لہو تحریکِ آزادی کو ہمیشہ زندہ رکھے گا۔ انہوں نے یقین دلایا کہ پاکستان کشمیری عوام کے مقدمے کو ہر فورم پر اٹھاتا رہے گا اور کشمیری عوام کو اقوامِ متحدہ کی قراردادوں کے مطابق حق خودارادیت ملنا چاہیے۔

وزیراعظم شہباز شریف نے کہا کہ سید علی گیلانی کی سیاسی بصیرت اور مدبرانہ قیادت نے کشمیر اور کشمیریوں کی آواز کو دنیا بھر میں پہنچایا۔ انہوں نے کہا کہ گیلانی کی زندگی کشمیریوں کے لیے ظالمانہ تسلط کے خلاف مزاحمت کی علامت ہے اور ان کی سیاسی تعلیمات کشمیری نسلوں کے لیے حق خودارادیت کی میراث ہیں۔ وزیراعظم نے ان کا مشہور نعرہ "ہم پاکستانی ہیں، پاکستان ہمارا ہے" کشمیریوں کی زبان پر زندہ اور مظلوموں کے دل و دماغ پر اثر انداز قرار دیا۔