پی ایس ایل 11: سیالکوٹ کی ٹیم کا نام بدل کر ملتان سلطانز رکھ دیا گیا

لاہور: پاکستان سپر لیگ (پی ایس ایل) سیزن 11 میں شامل فرنچائز سیالکوٹ اسٹالینز کو باضابطہ طور پر ملتان سلطانز کے نام سے ری برانڈ کر دیا گیا ہے۔ یہ اعلان منگل کو پی ایس ایل کے چیف ایگزیکٹو سلمان نصیر نے کیا۔

یہ خبر ایک مشترکہ پریس کانفرنس میں سامنے آئی، جس میں فرنچائز کے مالک حمزہ مجید اور سی ڈی وینچرز کے سربراہ گوہر شاہ بھی موجود تھے۔

اسلام آباد میں ہونے والی ٹیم نیلامی کے دوران او زیڈ ڈیولپرز نے سیالکوٹ اسٹالینز کی فرنچائز 10 سال کے لیے 18.5 ارب روپے میں خریدی تھی، تاہم اب اس نے سی ڈی وینچرز کے ساتھ اسٹریٹجک شراکت داری اختیار کر لی ہے۔ اس نئے انتظام کے تحت گوہر شاہ کو فرنچائز کا چیف ایگزیکٹو آفیسر مقرر کیا گیا اور ٹیم کا نام بدل کر ملتان سلطانز رکھ دیا گیا۔

پی ایس ایل کے چیف ایگزیکٹو سلمان نصیر کے مطابق اس تازہ تبدیلی کے بعد فرنچائز کی سالانہ مالیت 2 ارب روپے تک پہنچ گئی ہے۔ انہوں نے بتایا کہ چیف ایگزیکٹو بننے کے بعد گوہر شاہ نے ٹیم کے نام کی تبدیلی کی درخواست کی، جسے منظوری دے دی گئی۔

گزشتہ ہفتوں میں سیالکوٹ اسٹالینز کے حوالے سے قیاس آرائیاں گردش کرتی رہیں، جن میں او زیڈ ڈیولپرز کے حصص فروخت کرنے اور مالی مشکلات کے دعوے شامل تھے۔

پریس کانفرنس میں گوہر شاہ نے تصدیق کی کہ وہ باضابطہ طور پر فرنچائز کے چیف ایگزیکٹو آفیسر کے طور پر شامل ہو گئے ہیں اور ان کی خواہش ہے کہ جنوبی پنجاب کی نمائندگی لیگ میں مضبوط ہو۔

انہوں نے کہا: “اکیلا اسٹالین پی ایس ایل نہیں جیت سکتا، آگے بڑھنے کے لیے اسٹالین کو سلطان چاہیے، اور ہم سلطان بن کر آئے ہیں۔ ملتان کی شناخت کو برقرار رکھنا ہمارے لیے بہت اہم ہے۔”

واضح رہے کہ پاکستان سپر لیگ سیزن 11 کا انعقاد 26 مارچ سے 3 مئی 2026 تک ہوگا۔