حکومت پاکستان کشمیری عوام سے غیرمتزلزل یکجہتی کا اعادہ کرتی ہے،وزیر اعظم شہباز شریف

اسلام آباد  : وزیراعظم محمد شہباز شریف نے یوم استحصال کشمیر کے موقع پر کشمیری عوام کے ساتھ پاکستانی عوام کی غیر متزلزل یکجہتی کا اعادہ کیا ہے اور بھارت کے غیر قانونی اقدامات کی شدید مذمت کی۔ اپنے پیغام میں انہوں نے کہا کہ یہ دن بھارتی بربریت کی ایک سنجیدہ یاد دہانی ہے اور بھارت کا غیر قانونی اور ناجائز قبضہ نہ صرف کشمیر کے عوام کے حقوق کی پامالی ہے بلکہ پورے خطے کے امن کو خطرے میں ڈال رہا ہے۔

وزیراعظم شہباز شریف نے کہا کہ بھارت کشمیری قیادت کو خاموش کرنے کی کوششیں کر رہا ہے، جو کہ بھارت کے وسیع تر تسلط پسند اور انتہا پسندانہ ایجنڈے کا حصہ ہیں۔ انہوں نے اس بات پر زور دیا کہ جموں و کشمیر کے تنازعے کا منصفانہ حل پاکستان کی خارجہ پالیسی کا اہم ستون ہے اور دنیا کو مقبوضہ کشمیر میں بھارتی مظالم اور انسانی حقوق کی سنگین خلاف ورزیوں کو روکنے کے لیے اپنا کردار ادا کرنا چاہیے۔

انہوں نے مزید کہا کہ کشمیری عوام کو اپنے ہی وطن میں بے اختیار کمیونٹی بننے کا خطرہ ہے، اور پاکستان کشمیریوں کے جائز حقوق کے حصول تک ان کی سیاسی، سفارتی اور اخلاقی حمایت جاری رکھے گا۔

وزیراعظم کا کہنا تھا کہ پاکستان کشمیریوں کے حقِ خودارادیت کی حمایت میں ہر سطح پر آواز اٹھاتا رہے گا اور عالمی برادری سے مطالبہ کرتا ہے کہ وہ بھارت کے غیر قانونی اقدامات کا نوٹس لے اور کشمیری عوام کے حقوق کی بحالی کے لیے عملی اقدامات کرے۔