پنجگور: سکیورٹی فورسز کا بڑا آپریشن، ’فتنہ الہندوستان‘ کے ریمانڈ پر چلنے والے 6 دہشت گرد ہلاک، ٹھکانے تباہ

راولپنڈی/پنجگور:بلوچستان کے ضلع پنجگور میں سکیورٹی فورسز نے خفیہ اطلاعات پر مبنی ایک انتہائی کامیاب اور بڑا آپریشن کرتے ہوئے بھارتی سرپرستی میں کام کرنے والے 6 دہشت گردوں کو ہلاک کر دیا ہے۔ پاک فوج کے شعبہ تعلقات عامہ (آئی ایس پی آر) کے مطابق یہ انٹیلی جنس بیسڈ آپریشن (IBO) دہشت گردوں کی موجودگی کی پکی اطلاع پر کیا گیا۔

آئی ایس پی آر کے مطابق آپریشن کے دوران سکیورٹی فورسز نے انتہائی بہادری اور حکمتِ عملی کے ساتھ دہشت گردوں کے متعدد ٹھکانوں پر کاری ضرب لگائی۔ فائرنگ کے شدید تبادلے کے بعد 6 دہشت گرد مارے گئے، جو علاقے میں سکیورٹی فورسز اور معصوم شہریوں پر متعدد کارروائیوں میں براہِ راست ملوث تھے اور انہیں سرحد پار سے بھارتی سرپرستی حاصل تھی۔

سکیورٹی فورسز نے کارروائی کے بعد دہشت گردوں کے زیرِ استعمال ٹھکانوں سے بھاری مقدار میں جدید خودکار اسلحہ، گولہ بارود، دھماکہ خیز مواد اور ایک گاڑی بھی اپنے قبضے میں لے لی ہے۔ آئی ایس پی آر کا کہنا ہے کہ علاقے سے دیگر ممکنہ خطرات اور سہولت کاروں کے خاتمے کے لیے سرچ اور کلیئرنس آپریشن بدستور جاری ہے۔
دوسری جانب وفاقی وزیر داخلہ نے پنجگور میں سکیورٹی فورسز کے اس کامیاب آپریشن کو سراہتے ہوئے افسران اور جوانوں کو شاندار الفاظ میں خراجِ تحسین پیش کیا ہے۔ اپنے بیان میں انہوں نے کہا کہ ’فتنہ الہندوستان‘ کے آلہ کاروں کے خلاف یہ کارروائی ملک دشمن عناصر کے منہ پر زوردار طمانچہ ہے، اور پاکستان کے امن کو سبوتاژ کرنے کی ہر بیرونی سازش کو جڑ سے اکھاڑ پھینکا جائے گا۔