لاہور : محکمہ موسمیات نے آج ملک کے بیشتر علاقوں میں موسم سرد اور خشک رہنے کی پیش گوئی کی ہے، جبکہ پہاڑی علاقوں میں شدید سردی متوقع ہے۔
رپورٹ کے مطابق اسلام آباد اور گردونواح میں موسم سرد اور خشک رہے گا۔ خیبرپختونخوا کے بیشتر اضلاع میں موسم سرد اور جزوی ابر آلود رہنے کا امکان ہے، جبکہ بالائی اضلاع میں شدید سردی اور جزوی ابر آلود موسم کی پیش گوئی کی گئی ہے۔
پنجاب کے بیشتر اضلاع میں بھی موسم سرد اور خشک رہنے کی توقع ہے، خاص طور پر خطہ پوٹھوہار، مری، گلیات اور گردونواح میں شدید سردی رہے گی اور شام/رات کے اوقات میں جزوی ابر آلود موسم رہنے کا امکان ہے۔ بلوچستان کے بیشتر اضلاع میں موسم خشک اور جزوی ابر آلود رہنے کی توقع ہے، جبکہ پہاڑی علاقوں میں شدید سردی رہے گی۔ سندھ کے بیشتر اضلاع میں بھی موسم خشک اور سرد رہنے کا امکان ہے۔
محکمہ موسمیات کے مطابق گلگت بلتستان اور کشمیر میں موسم سرد اور خشک رہے گا، جبکہ رات کے اوقات میں شدید سردی اور جزوی ابر آلود موسم متوقع ہے۔ آج ملک کے مختلف علاقوں میں کم سے کم درجہ حرارت کی رپورٹ کے مطابق لہہ میں منفی 13 ڈگری سینٹی گریڈ، زیارت میں منفی 07، گوپس، قلات، کوئٹہ میں منفی 06، استور، کالام اور سکردو میں منفی 04، بگروٹ، مالم جبہ اور ہنزہ میں منفی 03، جبکہ دیر اور راولاکوٹ میں منفی 02 ڈگری سینٹی گریڈ ریکارڈ کیا گیا۔
