ملک کے مختلف علاقوں میں آج سے بارش اور برفباری کا آغاز ہوگا

لاہور : ملک کے مختلف علاقوں میں آج سے بارش اور برفباری کا سلسلہ شروع ہو گا۔ محکمہ موسمیات نے پیشگوئی کی ہے کہ بارش اور برفباری کا یہ سلسلہ منگل تک جاری رہنے کا امکان ہے۔

پنجاب کے بالائی علاقوں میں 8 سے 10 فروری تک بارش اور برفباری کی توقع ظاہر کی گئی ہے، اور پنجاب کے بیشتر اضلاع میں بھی بارش ہونے کی پیشگوئی کی گئی ہے۔ خاص طور پر فیصل آباد ڈویژن میں 9 سے 10 فروری کے دوران گھنے بادلوں کے ساتھ بارش متوقع ہے۔

بلوچستان کے 19 اضلاع میں آج ہلکی بارش کی پیشگوئی ہے، جب کہ چمن، پشین، قلعہ عبد اللہ، قلعہ سیف اللہ اور زیارت کے پہاڑی علاقوں میں ہلکی برفباری کا امکان ہے۔

خیبرپختونخوا کے بیشتر اضلاع میں بھی آج سے منگل تک بارش اور پہاڑوں پر برفباری کا امکان ظاہر کیا گیا ہے۔ پشاور سمیت صوبے کے میدانی اضلاع میں آج رات سے بارش شروع ہو سکتی ہے۔

کراچی میں بھی مطلع ابرآلود رہنے اور چند مقامات پر بارش کی توقع ہے۔ پی ڈی ایم اے نے تمام ضلعی انتظامیہ اور متعلقہ اداروں کو الرٹ رہنے اور پیشگی اقدامات کرنے کی ہدایت دی ہے۔

موسم کی اس تبدیلی کے پیش نظر، متعلقہ حکام نے شہریوں کو احتیاطی تدابیر اختیار کرنے کی نصیحت کی ہے تاکہ کسی بھی ناگہانی صورت حال سے بچا جا سکے۔