لاہور : ملک بھر میں گرمی کی شدت میں بتدریج اضافہ ہو رہا ہے، جس کے باعث پنجاب ڈیزاسٹر مینجمنٹ اتھارٹی (پی ڈی ایم اے) نے موسم گرما کی تعطیلات کے حوالے سے ایک تجویز پیش کی ہے۔ پی ڈی ایم اے نے ہیٹ ویو کے خطرے کے پیش نظر محکمہ سکول ایجوکیشن، ہائر ایجوکیشن اور صوبے کے کمشنرز و ڈپٹی کمشنرز کو ایک مراسلہ جاری کیا ہے۔
پی ڈی ایم اے کے ڈائریکٹر جنرل عرفان علی کاٹھیا کی جانب سے بھیجے گئے مراسلے میں کہا گیا ہے کہ سکولوں کے اوقات میں ردوبدل کیا جائے اور شدید گرمی کے دوران موسم گرما کی تعطیلات کا اعلان جلد کیا جائے۔ مراسلے میں مزید کہا گیا کہ سکولوں اور کالجوں میں بلا تعطل صاف اور ٹھنڈے پانی کی فراہمی کو یقینی بنایا جائے، اور بچوں کو ہلکے، ڈھیلے ڈھالے کپڑے پہننے کی ہدایات دی جائیں۔
مراسلے میں یہ بھی کہا گیا کہ آؤٹ ڈور سرگرمیوں پر فوری طور پر پابندی لگائی جائے، اور کلاس رومز میں وینٹیلیشن، پنکھے اور کولنگ سسٹم کو فعال رکھا جائے تاکہ طلباء کو گرمی سے بچایا جا سکے۔
پی ڈی ایم اے نے سکولوں میں ابتدائی طبی امداد کے کاؤنٹرز قائم کرنے اور ہیٹ ویو کے بارے میں تربیت یافتہ سٹاف کو تعینات کرنے کی بھی ہدایت کی ہے۔ اس کے علاوہ، ڈسٹرکٹ ڈیزاسٹر مینجمنٹ اتھارٹیز کے ساتھ مسلسل رابطہ رکھنے کی تاکید کی گئی ہے تاکہ معلومات کی ترسیل بروقت اور مؤثر انداز میں کی جا سکے۔
