پنجاب اسمبلی میں سینیٹ کی خالی نشست پر ضمنی انتخاب، اپوزیشن کا ووٹ کاسٹ نہ کرنے کا اعلان

لاہور :  پنجاب اسمبلی میں پاکستان تحریک انصاف (پی ٹی آئی) کے رہنما اعجاز چودھری کی نااہلی کے بعد خالی ہونے والی سینیٹ نشست پر ضمنی انتخاب کے لیے پولنگ کا آغاز ہو گیا ہے، جو صبح 9 بجے سے شام 4 بجے تک بلا تعطل جاری رہے گی۔

پولنگ کا عمل پنجاب اسمبلی کی نئی عمارت میں جاری ہے، جبکہ کاغذاتِ نامزدگی واپس لینے کا وقت گزر جانے کے بعد دونوں فریقوں کے امیدوار میدان میں موجود ہیں۔ تاہم، اپوزیشن نے انتخابی عمل کا بائیکاٹ کرنے کا اعلان کر دیا ہے۔

 اس ضمنی انتخاب میں:حکومتی اتحاد کی جانب سے مسلم لیگ (ن) کے رہنما اور سابق وزیرِ داخلہ رانا ثناء اللہ امیدوار ہیں۔
جبکہ اپوزیشن نے پی ٹی آئی کے نااہل رہنما اعجاز چودھری کی اہلیہ سلمیٰ اعجاز کو میدان میں اتارا ہے۔
تاہم، اپوزیشن اتحاد نے آج ووٹ کاسٹ نہ کرنے کا فیصلہ کیا ہے۔ ڈپٹی اپوزیشن لیڈر معین قریشی نے واضح الفاظ میں کہا ہے کہ کوئی رکن اگر ووٹ ڈالے گا تو وہ پارٹی پالیسی کی خلاف ورزی کرے گا۔

 پنجاب اسمبلی کی کل نشستیں 371 ہیں، جن میں سے موجودہ اراکین کی تعداد 363 ہے، جبکہ 8 نشستیں خالی ہیں۔

ایوان کی موجودہ جماعتی پوزیشن درج ذیل ہے:

مسلم لیگ (ن): 229
پیپلز پارٹی: 16
آئی پی پی: 7
مسلم لیگ (ق): 11
سنی اتحاد کونسل: 73
تحریک انصاف: 24
تحریک لبیک، مسلم لیگ ضیاء، مجلس وحدت مسلمین: 1،1،1
ذرائع کے مطابق، رانا ثناء اللہ کو 263 ووٹوں کی حمایت حاصل ہے جبکہ جیت کے لیے صرف 181 ووٹ درکار ہیں۔ دوسری طرف، اپوزیشن کی امیدوار سلمیٰ اعجاز کو محض 100 ووٹوں کی حمایت حاصل ہے، اور وہ بھی اس صورت میں جب اپوزیشن ووٹ ڈالتی، جو اب ممکن نہیں رہا۔

 یہ نشست 9 مئی کیسز میں سزا پانے والے پی ٹی آئی کے رہنما اعجاز چودھری کی نااہلی کے بعد خالی ہوئی تھی۔ موجودہ حالات میں حکومت کے پاس عددی اکثریت ہونے کے باعث یہ انتخاب یکطرفہ ہوتا دکھائی دے رہا ہے اور رانا ثناء اللہ کی کامیابی تقریباً یقینی تصور کی جا رہی ہے۔