پاک فضائیہ کی ورلڈ ڈیفنس شو 2026 میں شرکت: جدید ٹیکنالوجی کی نمائش

راولپنڈی :پاک فضائیہ کا دستہ سعودی عرب میں ہونے والے ورلڈ ڈیفنس شو 2026 میں شرکت کر رہا ہے، جہاں انہوں نے اپنے جدید ترین JF-17 تھنڈر بلاک-III ملٹی رول فائٹر جیٹ اور سپر مشاق بیسک ٹرینر طیارے کی نمائش کی۔ یہ شو دفاع اور سلامتی کے شعبے میں ایک اہم عالمی فورم ہے، اور پاک فضائیہ کی شرکت نے پاکستان کی عالمی دفاعی پوزیشن کو مزید مستحکم کیا ہے۔

آئی ایس پی آر کے مطابق، ورلڈ ڈیفنس شو 2026 میں پاکستان کی شرکت اس کی تیزی سے ترقی کرتی ہوئی مقامی ایرو اسپیس صنعت اور پاک فضائیہ کی آپریشنل صلاحیتوں کی عکاسی کرتی ہے۔ JF-17 بلاک-III پاکستان کی عسکری ہوابازی ٹیکنالوجی کا بہترین نمونہ ہے، جس میں جدید ایویانکس، اے ای ایس اے ریڈار، الیکٹرانک وارفیئر سسٹم اور بی وی آر میزائل جیسی خصوصیات شامل ہیں، جو اسے 4.5 جنریشن فائٹر طیارہ بناتی ہیں۔

سپر مشاق طیارہ پائلٹ ٹریننگ کے لیے پاکستان کی مضبوط صلاحیتوں کو ظاہر کرتا ہے۔ اس طیارے کی کم لاگت، قابلِ اعتماد کارکردگی اور آسان دیکھ بھال کے باعث اسے دنیا بھر میں متعدد ممالک اپنی فضائی افواج میں شامل کر چکے ہیں۔

ورلڈ ڈیفنس شو میں پاک فضائیہ کی شرکت، دفاعی تعاون اور برآمدات کے فروغ کے ساتھ ساتھ پاکستان اور دوست ممالک کے درمیان تزویراتی شراکت داری کو مزید مستحکم کرنے کی کوششوں کی عکاسی کرتی ہے۔ اس نمائش میں عالمی وفود، دفاعی حکام اور عسکری صنعت کے نمائندوں کو تعاون، تربیت اور ٹیکنالوجی کے تبادلے کے مواقع میسر آئیں گے۔