اسلام آباد : وزیراعظم شہباز شریف نے کہا ہے کہ جامع اور شاندار رمضان پیکیج قابل تعریف ہے، جس کے تحت ہر خاندان کو 5 ہزار روپے ملیں گے۔ انہوں نے نیشنل ٹیلی کام ہیڈکوارٹر کا دورہ کیا اور رمضان 2025 کے مانیٹرنگ نظام کا جائزہ لیا۔ حکام نے انہیں ڈیجیٹل والٹ کے ذریعے رمضان المبارک کے دوران فی خاندان 5 ہزار روپے کی ادائیگی پر بریفنگ دی۔
وزیراعظم نے اس موقع پر کہا کہ اس شاندار پروگرام کی تکمیل پر سب کو دل کی گہرائیوں سے مبارکباد پیش کرتا ہوں، وزیر آئی ٹی، حکومت کے سیکرٹریز اور متعلقہ حکام نے مل کر ایک چیلنج کو قبول کیا۔ انہوں نے مزید کہا کہ ماضی میں یوٹیلٹی سٹورز میں بدترین کرپشن کی کہانیاں تھیں، مگر اب نئے ڈیجیٹل والٹ کے ذریعے کرپشن کا خاتمہ کیا گیا ہے۔
شہباز شریف نے بتایا کہ اس پروگرام کے تحت 40 لاکھ خاندانوں کے 2 کروڑ سے زائد افراد کو فائدہ پہنچے گا اور اس پروگرام کی لاگت 20 ارب روپے ہے۔ انہوں نے کہا کہ حکومت نے پہلی بار شفاف طریقے سے کام کیا ہے، اور اس پروگرام میں نہ قطاریں لگیں اور نہ ہی کوئی شکایت سامنے آئی۔ وزیراعظم کا کہنا تھا کہ ماضی میں عوام کا پیسہ کرپشن کی نذر ہوتا تھا، جو بڑا ظلم تھا۔ اس پروگرام میں شفافیت کو ترجیح دی گئی ہے اور گورنر اسٹیٹ بینک سے درخواست کی کہ وہ ڈیجیٹل والٹ کے طریقہ کار کے بارے میں عوام کو آگاہ کریں۔
