لاہور،ہائی کورٹ نے وزیراعظم کے مشیران خاص کی قابلیت کا ریکارڈ طلب کرلیا
چیف جسٹس لاہورہائی کورٹ جسٹس محمدقاسم خان نے وزیراعظم عمران خان کے 17 مشیرانِ خاص کے تقررکے خلاف ندیم سرور ایڈووکیٹ کی درخواست پرسماعت کی ۔
درخواست گزار کا مؤقف ہےکہ وفاقی کابینہ میں غیر منتخب افراد کو شامل کیا گیا ہے حالانکہ آئین کےتحت وزیر اعظم کی سفارش پر صرف رکنِ اسمبلی ہی وفاقی وزیر کے عہدے پر مقرر کیا جاسکتا ہے۔
درخواست گزار کا کہنا ہےکہ آرٹیکل2 اےکے تحت غیر منتخب شخص ریاست کے اختیارات استعمال نہیں کرسکتا، جب کہ آرٹیکل 90کی ضمنی دفعہ ایک کے تحت وفاقی حکومت غیرمنتخب افرادکو شامل کرکےنہیں چلائی جا سکتی۔
عدالت نے وزیراعظم عمران خان کے تمام مشیروں کی کوالیفکیشن کا ریکارڈ طلب کرلیا اور استفسار کیا کہ ان مشیران ِخاص نےکابینہ میں کیاامورانجام دیے۔
چیف جسٹس لاہورہائی کورٹ نے ریمارکس دیئے کہ الیکشن ہارنےکےبعد وفاقی وزیر خزانہ عبدالحفیظ شیخ کو اخلاقی طورپر مستعفی ہوجاناچاہیے تھا۔
