افواجِ پاکستان کا بھارت کو منہ توڑ جواب : ملک کو بنانے کیلئے بے پناہ قربانیاں دیں ، حفاظت کرنا جانتےہیں،جنرل عاصم منیر

اسلام آباد :  افواجِ پاکستان نے بھارت کی حالیہ جارحیت کا بھرپور، فوری اور منہ توڑ جواب دیتے ہوئے ’’آپریشن بُنْيَانٌ مَّرْصُوْص‘‘ کے تحت قومی اتحاد، عسکری صلاحیت اور دفاعی عزم کا شاندار مظاہرہ کیا ہے۔ اس آپریشن نے نہ صرف سرحد پار بھارت کو واضح پیغام دیا بلکہ دنیا بھر میں پاکستان کی عسکری طاقت، حوصلے اور قربانیوں کو تسلیم کروایا۔

آئی ایس پی آر کے مطابق افواجِ پاکستان نے جو کہا، وہ کر کے دکھایا۔ بارہا بھارت کو خبردار کیا گیا تھا کہ پاکستان کی امن کی خواہش کو کمزوری نہ سمجھا جائے۔ بالآخر بھارت کی جارحانہ کارروائی کا جواب ’’عملی اور بھرپور انداز‘‘ میں دیا گیا، جس سے دشمن کو واضح پیغام مل گیا کہ پاکستان اپنے دفاع میں کسی بھی حد تک جا سکتا ہے۔

آرمی چیف جنرل سید عاصم منیر نے قرآن مجید کی آیات کا حوالہ دیتے ہوئے کہا کہ اللہ کی مدد سے بارہا ایسا ہوا ہے کہ ایک چھوٹی قوت نے بڑی طاقت کو شکست دی۔ ان کا کہنا تھا کہ افواجِ پاکستان اور پوری قوم، دشمن کے خلاف ایک سیسہ پلائی ہوئی دیوار کی مانند کھڑی ہیں۔

جنرل عاصم منیر نے مزید کہا کہ 13 لاکھ بھارتی فوج اور ان کے جدید ہتھیار پاکستان کو نہ ڈرا سکتے ہیں اور نہ ہی دبا سکتے ہیں۔ ’’ہم نے اپنے وطن کو خون دے کر حاصل کیا ہے، اور اس کی حفاظت کرنا بھی بخوبی جانتے ہیں۔‘‘

ڈی جی آئی ایس پی آر لیفٹیننٹ جنرل ارشد شریف چودھری نے بھی واضح الفاظ میں کہا کہ پاکستانی قوم بھارت کی مکاری اور دھمکیوں سے مرعوب نہیں ہو سکتی۔ ’’ہم نے فیصلہ کیا ہے، اب دشمن ہمارے جواب کا انتظار کرے۔‘‘

دفاعی تجزیہ کاروں نے بھی اس آپریشن کو پاکستان کی عسکری حکمت عملی اور عزم کی واضح مثال قرار دیا ہے، جس نے بھارتی جارحیت کو بے اثر کر کے رکھ دیا۔ ماہرین کا کہنا ہے کہ افواجِ پاکستان نے دنیا کو دکھا دیا ہے کہ پاکستان کی سالمیت کو چیلنج کرنا کسی بھی دشمن کے لیے نقصان دہ ثابت ہوگا۔