حافظ عبدالرؤف کی موت کی خبریں جھوٹ پر مبنی ، بھارتی پروپیگنڈا بے نقاب

اسلام آباد :  بھارت کی جانب سے حافظ عبدالرؤف کے مارے جانے کے حوالے سے جو خبریں پھیلائی جا رہی تھیں، وہ بالکل بے بنیاد اور جھوٹ پر مبنی نکلی ہیں۔ بھارتی حکومت اور میڈیا اس پروپیگنڈے میں مصروف تھے کہ حافظ عبدالرؤف کو پاکستانی حملوں میں مارا جا چکا ہے، تاہم یہ تمام دعوے جھوٹے ثابت ہوئے ہیں۔

بھارتی میڈیا نے حافظ عبدالرؤف کی نماز جنازہ کی تصاویر دکھاتے ہوئے یہ تاثر دینے کی کوشش کی کہ وہ بھارت کے حملے میں مارے گئے ہیں۔ برطانیہ میں تعینات بھارتی سفیر نے ان تصاویر کو سکائے نیوز کے پروگرام میں بھی دکھایا، جس سے پروپیگنڈے کو مزید تقویت ملی۔ تاہم، ڈی جی آئی ایس پی آر نے پریس کانفرنس میں حافظ عبدالرؤف کے زندہ ہونے کا ثبوت فراہم کیا، اور ان کا تازہ ویڈیو بیان میڈیا کے سامنے پیش کیا گیا، جس سے یہ واضح ہو گیا کہ حافظ عبدالرؤف بالکل زندہ ہیں۔

ڈی جی آئی ایس پی آر نے اس پروپیگنڈے کو بے نقاب کرتے ہوئے کہا کہ بھارت ہمیشہ بغیر کسی ثبوت کے جھوٹ پھیلانے میں مصروف رہتا ہے اور اس نے عالمی سطح پر پاکستان کو بدنام کرنے کی ایک اور ناکام کوشش کی ہے۔ یاد رہے کہ حافظ عبدالرؤف پاکستان کی سیاسی جماعت سے وابستہ ہیں اور ان کے مارے جانے کی خبر بھارتی میڈیا کی جانب سے من گھڑت تھی۔