امریکی فوج غزہ میں نہیں جائے گی، بین الاقوامی افواج کو فلسطینی علاقے کے قریب تعینات کرنے کی منصوبہ بندی جاری

واشنگٹن : پینٹاگون کے ایک اعلیٰ عہدیدار نے تصدیق کی ہے کہ امریکا غزہ کی پٹی میں کسی بھی قسم کے فوجی نہیں بھیجے گا۔ عہدیدار نے اس بات کا اعتراف کیا کہ بین الاقوامی افواج کو فلسطینی علاقے کے قریب تعینات کرنے کے لیے منصوبہ بندی کی جا رہی ہے، تاہم امریکی فوج غزہ میں نہیں جائے گی۔

پینٹاگون کے عہدیدار نے کہا کہ اسرائیلی میڈیا میں گردش کرنے والی رپورٹس میں کوئی حقیقت نہیں ہے، جن میں دعویٰ کیا گیا تھا کہ امریکا غزہ کی سرحد کے قریب فوجی اڈہ قائم کرے گا۔ تاہم، انہوں نے یہ بھی اشارہ دیا کہ امریکا اور اس کے عالمی فوجی اتحادی غزہ کے قریب بین الاقوامی فوجی دستوں کو تعینات کرنے کے امکانات پر غور کر رہے ہیں۔

ان بین الاقوامی افواج کو انٹرنیشنل سٹیبلائزیشن فورس کے تحت تعینات کیا جائے گا، جو امریکی صدر کے غزہ امن منصوبے کی حمایت کریں گی۔ عہدیدار نے واضح کیا کہ "کسی امریکی فوجی کو غزہ میں تعینات نہیں کیا جائے گا" اور جو کچھ بھی اس کے برعکس رپورٹ کیا جا رہا ہے، وہ غلط ہے۔

اس سے پہلے اسرائیلی میڈیا میں یہ رپورٹس سامنے آئی تھیں کہ امریکا غزہ کی سرحد کے قریب 500 ملین ڈالر کی لاگت سے ایک فوجی اڈہ قائم کرنے کی منصوبہ بندی کر رہا ہے، جس میں کئی ہزار امریکی فوجیوں کی تعیناتی کی گنجائش ہو گی۔