آئی فون 17 کی قیمتوں میں دلچسپ تبدیلی، کچھ مارکیٹس میں رعایت تو کہیں اضافہ

کیلیفورنیا : آئی فون 17 سیریز کی قیمتوں میں مختلف عالمی مارکیٹس میں نمایاں تبدیلیاں دیکھنے میں آرہی ہیں۔ ایک جانب ریٹیلرز پرانے سٹاک کو فروخت کرنے کے لیے آئی فون 17 کے مختلف ماڈلز پر رعایت دے رہے ہیں، جبکہ دوسری جانب ایپل نے بیس ماڈل کی قیمت میں اضافہ کردیا ہے۔

رپورٹس کے مطابق ایپل نے آئی فون 17 کی قیمت میں 100 ڈالر کا اضافہ کیا ہے۔ پرانے آئی فون ماڈلز کی قیمت بڑھانا کمپنی کے لیے ماضی میں غیر معمولی اقدام سمجھا جاتا تھا، تاہم 2026 میں بڑھتی ہوئی پیداواری لاگت کے باعث بڑی ٹیک کمپنیوں میں قیمتوں میں اضافے کا رجحان دیکھا جا رہا ہے۔

دوسری طرف آئی فون 17 پرو اور آئی فون 17 پرو میکس کی پیداوار ختم ہونے کے بعد مختلف ریٹیلرز باقی سٹاک کو جلد فروخت کرنے کے لیے ان ماڈلز پر خصوصی رعایتیں دے رہے ہیں۔

آسٹریلیا میں جے بی ہائی فائی نے بیس آئی فون 17 کی قیمت 1499 آسٹریلوی ڈالر سے کم کرکے 1399 ڈالر کردی ہے۔ جرمنی میں آئی فون 17 پرو میکس کا 256 جی بی ماڈل میڈیا مارکیٹ پر 1329 یورو میں دستیاب ہے، جو اس کی 1449 یورو کی ابتدائی قیمت سے 120 یورو کم ہے۔

برطانیہ میں بھی آئی فون 17 پرو اور پرو میکس پر رعایت دیکھی جارہی ہے۔ ایمازون پر دونوں ماڈلز ایپل کی سرکاری قیمت کے مقابلے میں تقریباً 100 پاؤنڈ کم میں فروخت کیے جارہے ہیں، جبکہ آئی فون ایئر کے 512 جی بی ماڈل پر بھی 200 پاؤنڈ تک کی رعایت موجود ہے۔

قیمت میں اضافے کی وجہ کیا ہے؟
رپورٹس کے مطابق آئی فون 17 کی قیمت میں اضافے کی بڑی وجہ مختلف کمپوننٹس اور میموری کی بڑھتی ہوئی لاگت ہے۔ 2026 کے دوران پیداواری اخراجات میں اضافے کے باعث ایپل سمیت متعدد ٹیک کمپنیوں نے اضافی لاگت کا کچھ حصہ صارفین کو منتقل کیا ہے۔

یہ رجحان صرف ایپل تک محدود نہیں۔ گوگل اور سام سنگ بھی اپنی نئی ڈیوائسز کی قیمتوں میں اضافہ کرچکے ہیں۔ مارکیٹ میں بڑھتی ہوئی لاگت اور جدید ٹیکنالوجی کے اخراجات کے باعث سمارٹ فونز کی قیمتوں میں مزید تبدیلیوں کا امکان بھی ظاہر کیا جارہا ہے۔

دوسری جانب کمپنیوں کی جانب سے پرانے ماڈلز پر رعایتیں صارفین کے لیے بہتر قیمت پر پریمیم سمارٹ فون خریدنے کا موقع فراہم کر رہی ہیں، تاہم محدود سٹاک کے باعث یہ آفرز زیادہ عرصے تک برقرار رہنے کی ضمانت نہیں۔