لاہور: وزیر اعلیٰ پنجاب مریم نواز نے سیاحت کی بحالی کے عالمی دن پر اپنے پیغام میں کہا ہے کہ صوبہ پنجاب کی خوبصورت سیاحتی مقامات کو دنیا کے سامنے لانے کے لئے اقدامات کئے جا رہے ہیں۔
اُن کا کہنا تھا کہ پنجاب کے مختلف خطوں میں سیاحت کا بے پناہ پوٹینشل پوشیدہ ہے، جو صحراؤں، پہاڑی سلسلوں، جھیلوں اور دریاؤں کی دھرتی پر مشتمل ہے۔ مریم نواز نے کہا کہ پنجاب میں سیاحت کے فروغ کے لئے دیرپا اقدامات کئے جا رہے ہیں اور معیشت، مقامی ثقافت اور بین الاقوامی تعلقات کے استحکام کے لیے سیاحت کا کردار ناگزیر ہے۔
وزیراعلیٰ پنجاب نے مزید کہا کہ مری گلاس ٹرین پراجیکٹ سیاحت کے فروغ میں گیم چینجر ثابت ہوگا، اور مری کو عالمی معیار کا سیاحتی مقام بنانے کے لیے ماسٹر پلان پر عمل جاری ہے۔ اس کے علاوہ، سیاحوں کے سفر کو محفوظ اور آرام دہ بنانے کے لئے اہم روڈز کی اپ گریڈیشن کی جا رہی ہے۔
مریم نواز نے کرتار پور میں عالمی معیار کا ہوٹل بنانے اور مذہبی سیاحت کو فروغ دینے کے لیے خصوصی توجہ دینے کا اعلان کیا۔ انہوں نے یہ بھی کہا کہ پنجاب میں نئے اور پرکشش سیاحتی مقامات متعارف کرائے جا رہے ہیں اور سیاحوں کی سکیورٹی کو یقینی بنانے کے لیے بہترین حفاظتی انتظامات کئے گئے ہیں۔
