لاہور : ملک کے کئی شہروں میں آج اور کل شدید بارش، ژالہ باری اور برفباری کی پیشگوئی کی گئی ہے۔ نیشنل ڈیزاسٹر مینجمنٹ اتھارٹی (NDMA) اور نیشنل ایمرجنسی آپریشن سینٹر نے خطرے کے پیشِ نظر الرٹ جاری کر دیا ہے۔
اسلام آباد، راولپنڈی، لاہور، فیصل آباد، جھنگ، خوشاب، میانوالی، ساہیوال، سرگودھا، حافظ آباد، نارووال اور شیخوپورہ سمیت پنجاب کے مختلف اضلاع میں تیز ہواؤں، گرج چمک کے ساتھ بارش اور کہیں کہیں ژالہ باری کا امکان ہے۔ ان علاقوں میں شہریوں کو خبردار کر دیا گیا ہے کہ وہ احتیاطی تدابیر اختیار کریں۔
ادھر خیبر پختونخوا کے پہاڑی علاقوں میں بارش کے ساتھ ساتھ برفباری بھی متوقع ہے، جس کے باعث لینڈ سلائیڈنگ اور برفانی تودے گرنے کا خدشہ ظاہر کیا جا رہا ہے۔ مالاکنڈ، ہزارہ، بنوں، چارسدہ، کرک، پشاور، مردان، سوات اور نوشہرہ سمیت کئی اضلاع متاثر ہو سکتے ہیں۔
پہاڑی علاقوں میں مسلسل بارش کے باعث ندی نالوں میں طغیانی اور نشیبی علاقوں میں سیلابی صورتحال پیدا ہو سکتی ہے۔این ڈی ایم اے نے شہریوں کو ہدایت کی ہے کہ غیر ضروری سفر سے گریز کریں، موسمی اپ ڈیٹس سے باخبر رہیں، اور NDMA ڈیزاسٹر الرٹ موبائل ایپ سے موسمی حالات کا جائزہ لیتے رہیں۔
