دریائے ستلج میں پانی کی سطح میں اضافہ، کئی مقامات پر بند ٹوٹنے سے سیلابی صورتحال

قصور : حالیہ بارشوں کی وجہ سے دریائے ستلج میں پانی کی سطح مسلسل بڑھ رہی ہے جس کے باعث کئی جگہوں پر بند ٹوٹ رہے ہیں اور علاقے سیلاب کی لپیٹ میں آ رہے ہیں۔

بہاولنگر کے علاقے بھوکاں پتن میں موضع توگیرہ شریف کے قریب بند ٹوٹ جانے سے بہت نقصان ہوا ہے۔ سیلابی پانی کی وجہ سے مومیکا روڈ بہہ گیا ہے اور کئی دیہات کا شہر سے زمینی راستہ منقطع ہو گیا ہے۔ فصلیں پانی میں ڈوب گئی ہیں اور کئی آبادیاں بھی زیر آب آ چکی ہیں۔ ریسکیو ٹیمیں متاثرہ لوگوں کو محفوظ جگہوں پر منتقل کر رہی ہیں۔

عارف والا کے قریب بھی دریائے ستلج کی صورتحال خراب ہے، جہاں حفاظتی بند سیلابی پانی کے دباؤ سے ٹوٹنے لگے ہیں جس سے مزید علاقے زیر آب آ گئے ہیں۔ یہاں بھی فصلوں کو شدید نقصان پہنچا ہے اور کئی چھوٹے گاؤں میں پانی داخل ہو چکا ہے۔ لوگ نقل مکانی کر رہے ہیں اور ریسکیو ادارے ان کی مدد کر رہے ہیں۔

قصور میں بھی دریائے ستلج کے سیلاب نے کئی دیہاتوں کو متاثر کیا ہے، جن میں بھکی ونڈ، چندا سنگھ والا، کالو واڑا اور حاکو والا شامل ہیں۔ ان علاقوں کا زمینی رابطہ منقطع ہو چکا ہے اور فصلیں پانی میں ڈوب گئی ہیں۔ انتظامیہ نے الرٹ جاری کر دیا ہے اور متاثرین کو محفوظ جگہوں پر منتقل کیا جا رہا ہے۔