پاک بحریہ کے کردار کو خراج تحسین پیش کرنے کیلئے وزیراعظم شہباز شریف کراچی پہنچ گئے

کراچی : وزیراعظم شہباز شریف آپریشن "بنیان مرصوص" میں پاک بحریہ کے اہم کردار کو خراج تحسین پیش کرنے کے لیے ایک روزہ دورے پر کراچی پہنچ گئے ہیں۔ کراچی ایئرپورٹ پر ان کا استقبال وزیراعلیٰ سندھ مراد علی شاہ، گورنر کامران ٹیسوری اور دیگر اہم شخصیات نے کیا۔

وزیراعظم کا پروگرام شامل ہے کہ وہ پاک بحریہ کے افسران اور جوانوں سے ملاقات کریں گے جو آپریشن "بنیان مرصوص" میں حصہ لے کر بھارتی بحریہ کے جارحانہ عزائم کو ناکام بنانے میں اہم کردار ادا کر چکے ہیں۔ پاک بحریہ کے سربراہ ایڈمرل نوید اشرف وزیراعظم کا استقبال کریں گے اور ان کی قیادت میں پاک بحریہ کی کامیابیوں کو سراہا جائے گا۔

 شہباز شریف اس موقع پر پاک بحریہ کے افسران اور جوانوں سے خطاب بھی کریں گے۔ اس کے علاوہ، وزیراعظم کی کراچی میں سیاسی قیادت سے ملاقاتوں کا بھی شیڈول ہے جس میں آئندہ مالی سال کے بجٹ، ترقیاتی منصوبوں اور ریونیو امور پر سٹیک ہولڈرز سے مشاورت کی جائے گی۔